Տաւութօղլու Հայոց Ցեղասպանութեան Բանաձեւին Հարցով Նախազգուշացուցած Է Միացեալ Նահանգները
\n
\n
\n
Թրքական «Հապեր 7» կայքը կը հաղորդէ, որ Թուրքիոյ արտաքին գործոց նախարար Ահմեթ Տաւութօղլու յայտարարած է, որ 1915-ի դէպքերուն առնչուող բանաձեւը Միացեալ Նահանգներու Ծերակոյտի եւ Ներկայացուցիչներու տան օրակարգ բերելու եւ ընդունելու պարագային իրենք լուռ պիտի չմնան:
\n
Տաւութօղլու նշած է, որ բանաձեւը հապճեպ կերպով օրակարգ բերուած է, սակայն Ծերակոյտի օրակարգ պիտի չմտնէ: «Նման բան չ՛ակնկալուիր: Պարոն Քերրին ալ նշեց, որ բանաձեւը յանձնախումբէն անդին պիտի չանցնի: Մեր դիրքորոշումն ու արձագանգը յստակ է: Թուրքիան նման քաղաքական շահարկումներ պիտի չարտօնէ: Մենք կը հետեւինք իրադարձութիւններուն», ըսած է ան:
\n
Թուրքիոյ արտաքին գործոց նախարարը յայտնած է, որ այս հանգրուանին այդ բանաձեւը Անգարա-Ուաշինկթըն յարաբերութիւններուն վրայ պիտի չազդէ:
\n
«Ծերակոյտի կամ Ներկայացուցիչներու տան կողմէ օրակարգ մտնելու կամ որեւէ յայտարարութեան պարագային մենք նախապէս ցոյց տուած մեր արձագանգը ցոյց պիտի տանք: Թուրքիան լուռ պիտի չմնայ: Սակայն նման հաւանականութիւն չենք նախատեսեր», ըսած է ան:
\n