Ըմբշամարտ. Գարիկ Բարսեղեան Տիտղոսակիր` Սոսլան Անտիեւի Անուան Մրցաշարքին

Հայաստանի ազատ ոճի ըմբշամարտի հաւաքականի անդամ, 57 քկ դասակարգին մասնակցող Գարիկ Բարսեղեան դարձաւ Սոսլան Անտիեւի անուան միջազգային մրցաշարքի տիտղոսակիր:

Հայրենի ըմբիշը աւարտականին 5-4 արդիւնքով առաւելութեան հասաւ Ռուսթամ Քարախանովի (Ղազախստան) դէմ:

Նոյն դասակարգին մէջ, Գառնիկ Մնացականեան տիրացաւ պրոնզ մետալին:

Հայաստանի հաւաքականին միւս անդամները` Գոռ Գրիգորեան, Վոլոդիա Ֆրանգուլեան, Դաւիթ Սաֆարեան եւ Վալդեր Մարգարեան, որեւէ մետալի չյաջողեցան տիրանալ:

Այս առնչութեամբ ArmSport.am աւելցուց, որ նոյն այս մրցաշարքին, սակայն նախորդ տարի, Բարսեղեան դարձեալ յաղթական հռչակուած էր:

Նշենք, որ Հայաստան, հաւաքականի գլխաւոր մարզիչ Արայիկ Բաղտատեանի գլխաւորութեամբ, իր մասնակցութիւնը կը բերէ Վլատիքաւքազի մէջ (Ռուսիա) տեղի ունեցող այս մրցաշարքին: