Արամ Ա. կաթողիկոս հանդիպում ունեցաւ Յունաստանի նախագահին հետ


ԱՆԹԻԼԻԱՍ – Երկուշաբթի, 19 Հոկտեմբեր 2015-ին, Աթէնք ժամանման յաջորդ օրը, Ն.Ս.Օ.Տ.Տ. Արամ Ա. Վեհափառ Հայրապետը հանդիպում ունեցաւ Յունաստանի Հանրապետութեան Նախագահ Տիար Փրոքոփիս Փաւլոբուլոսի հետ: Վեհափառ Հայրապետին կ’ընկերանային Յունաստանի Հայոց Թեմի Առաջնորդ Գերշ. Տ. Խորէն Արք. Տողրամաճեան եւ Ազգային Վարչութեան ատենապետ Տիար Արա Մանկոյեան:

Նորին Սրբութիւնը նախ ողջունեց Յունաստանի պետութեան կազմակերպած համագումարը՝ «Կրօններու ու մշակոյթներու խաղաղ գոյակցութիւնը Միջին Արեւելքէն ներս» խորագրով: Վեհափառ Հայրապետը յիշեցուց, թէ տարի մը առաջ Յունաստանի պետական անձնաւորութիւններու հետ տեսակցութեան ընթացքին առաջարկ ներկայացուցած էր, որ Յունաստանի պետութիւնը նման նախաձեռնութիւն մը առնէ, շեշտելով արեւելքը արեւմուտքին կամրջող Յունաստանի կարեւոր տեղն ու դերը:

Արամ Ա. Կաթողիկոս գնահատեց Յունաստանի Նախագահը, որ քաղաքական կեանք մուտք գործելէն ի վեր նեցուկ կանգնած է Հայ Դատին եւ այսօր իբրեւ նախագահ կը շարունակէ նոյն կեցուածքը:

  Նախագահ Փաւլոբուլոս յայտնեց, թէ ինք յարգանք ունի հայ ժողովուրդին ու անոր արդար դատին նկատմամբ եւ վստահեցուց թէ պիտի շարունակէ զօրավիգ կանգնիլ Հայ Դատին: Նախագահը նաեւ դրուատիքով խօսեցաւ Յունաստանի հայ գաղութին մասին, որ իր կարեւոր ներդրումը կը բերէ երկրի բարգաւաճման ու զարգացման: 


Leave a Comment

You must be logged in to post a comment.