Արշակ Քորեանին Պիտի Առաջարկուի Հանդէս Գալ Հայաստանի Ֆութպոլի Ազգային Հաւաքականէն

Հայաստանի ֆութպոլի ֆետերասիոնը Ռուսիոյ ֆութպոլի երիտասարդական հաւաքականի միջնապահ Արշակ Քորեանին պիտի առաջարկէ հանդէս գալ Հայաստանի ֆութպոլի ազգային հաւաքականէն, կը յայտնէ TotalFootball.am:

Հոլանտական Վիթես խումբին մաս կազմող Քորեան մինչեւ 2011 հանդէս եկած է Հայաստանի պատանեկան հաւաքականին հետ, իսկ 2011-էն 2014 մաս կազմած է Ռուսիոյ պատանեկան հաւաքականին:

Ներկայիս ան կը հանդիսանայ Ռուսիոյ երիտասարդական ֆութպոլի ազգային խումբի հիմնական մարզիկ:

Շարք մը լրատու աղբիւրներ կը յայտնեն հետեւեալը. «Մօտիկ ապագային Հայաստանի ֆութպոլի ֆետերասիոնը Քորեանին պիտի առաջարկէ միանալ Հայաստանի հաւաքականին` մասնակցելու համար 2018-ի Մոնտիալի զտումի մրցումներուն: Սակայն ֆետերասիոնը նախ պիտի խօսի անոր գործակալին, ընտանիքին եւ անշուշտ նաեւ մարզիկին հետ»:

Նշենք, որ Քորեան, համաձայն չգտնուելով իր պայմանագրութիւնը երկարաձգել Լոքոմոթիւ Մոսկուայի հետ, տեղափոխուեցաւ Վիթես:

Հոս տեղին է նշել, որ 19 տարեկան Քորեան նախորդ շաբաթավերջին Հելմոնթ Սփորի երիտասարդական խումբին դէմ տեղի ունեցած մրցումին բացաւ Վիթեսի նշանակած կոլերուն հաշիւը: