Թուրքիոյ Մօտ Ամերիկայի Դեսպանը՝ Ցեղասպանութեան Մասին


ԵՐԵՒԱՆ, «Արմէնփրէս».- Թուրքիոյ մօտ Ամերիկայի նորանշանակ դեսպան Ճան Պես յայտարարած է, որ չի կրնար ըսել, թէ Միացեալ Նահանգներու նախագահ Պարաք Օպաման հայ ժողովուրդին ուղղուած իր Ապրիլ 24ի ուղերձին մէջ ի՛նչ եզրով պիտի բնորոշէ «1915ի իրադարձութիւնները»: Ան նշած է, որ այդ իրադարձութիւններուն գծով ամերիկեան քաղաքականութիւնը չէ փոխուած:
Թրքական NTV կայանին տուած հարցազրոյցին ընթացքին, Պես ըսած է նաեւ, որ 1915ին տեղի ունեցած «սարսափելի կոտորածներու եւ ողբերգութիւններու» փաստերուն «ճիշդ եւ արդար» ընդունումը «օգտագակար պիտի ըլլայ թէ՛ թուրքերուն եւ թէ հայերուն համար»:
Անդրադառնալով Կալիփոլիի ճակատամարտի 100ամեակին հետ կապուած թրքական կողմի հրաւէրին՝ Պես նշած է, որ «դեռ կանուխ է ըսելու, թէ Ամերիկա պաշտօնական ինչպիսի՛ մակարդակով պիտի մասնակցի այդ միջոցառման»՝ միաժամանակ ընդգծելով, որ Թուրքիա Ամերիկայի «ամենակարեւոր գործընկերներէն մէկն է»:

Leave a Comment

You must be logged in to post a comment.