«Արտագաղթի Կասեցման Ծրագիրը Քննարկումների Փուլ Է Անցնում». Ա. Մինասեան
ԵՐԵՒԱՆ, «Թերթ».– «Հայ Յեղափոխական Դաշնակցութեան կողմից մշակուած Հայաստանում արտագաղթի կասեցման ծրագիրը դեռեւս քննարկումների փուլ է անցնում՝ այդ թւում նաեւ քառեակի շրջանակում»։ «Թերթ»ին հետ ունեցած զրոյցին ընթացքին այս մասին յայտնած է ՀՅԴի պատգամաւոր, ծրագիրի ղեկավար Արծուիկ Մինասեան՝ պնդելով, թէ ծրագիրը չէ մոռցուած:
«Մենք ներկայացրել ենք, հիմա նորից քննարկումներ ենք իրականացնում եւ յոյս ունենք, որ առաջիկայում նորից օրակարգային հարց կը դառնայ, որովհետեւ մի ուժի, մի քաղաքական միաւորման խնդիր չի սա: Քանի դեռ չի գիտակցուել, որ նման համապարփակ ծրագիր պէտք է մշակել եւ իրագործել, հնարաւոր չէ արդիւնքի հասնել», ըսած է ան։
Արծուիկ Մինասեան նշած է, թէ կացութիւնը այնպէս չէ, որ այդ ծրագիրին մասին Դաշնակցութիւնը յայտարարած է եւ ըսած, որ միայն ինք պիտի իրականացնէ: «Յատուկ ասում ենք, որ այդ ծրագիրը կարող է արդիւնք ունենալ, եթէ բոլորը մասնակցեն: Եթէ միայն իշխանութիւնն է՝ չի կարող, եթէ միայն ընդդիմութիւնն է, էլի չի կարող, առաւել եւս ընդդիմութեան որեւէ առանձին միաւոր չի կարող դա անել», աւելցուցած է ան: Աւելի՛ն. ըստ անոր՝ հասարակութեան բոլոր խաւերը պէտք է մասնակցին, որովհետեւ ա՛յդ է ծրագիրին էութիւնը։
«Քանի դեռ այդ գիտակցութիւնը ոչ բոլորի մօտ է, մենք աշխատում ենք, որ դա ամրապնդուի, որ անհրաժեշտ է համապարփակ, միասնական, ամբողջական ծրագիր եւ գործողութիւնների պլան», ըսած է Մինասեան։
Պատասխանելով հարցումի մը, թէ ինչո՞ւ գոնէ քառեակին կողմէ հարցը չի բարձրացուիր՝ պատգամաւորը ըսած է. «Իսկ ո՞վ ասաց, քննարկումները գնում են, երբ որ ես ասում եմ խօսակցութիւնները գնում են, հէնց դրա մասին է խօսքը»: