Թրքական Օդանաւային Ընկերութիւնը Տաճիկ Իսլամական Զինեալներ Կը Փոխադրէ Իրաք

«Արմէնփրես»` յղում կատարելով Իրանի յեղափոխական պահակագունդին մօտիկ եղող «Ֆարս» լրատու գործակալութեան, կը հաղորդէ, որ Թրքական օդանաւային ընկերութիւնը Իրաքի եւ Շամի իսլամական պետութեան (ՏԱՀԵՇ) անդամ ժիհատականներ Իսլամական պետութեան միանալու համար կը փոխադրէ Իրաք:

Ըստ իրանեան գործակալութեան, Թրքական օդանաւային ընկերութեան օդանաւերով արդէն Իրաք փոխադրուած են 91 տաճիկ ժիհատականներ:

Գործակալութիւնը` յղում կատարելով «անունը հրապարակել չուզած» աղբիւրին, հաղորդած է, որ Թրքական օդանաւային ընկերութեան պատկանող օդանաւերով 2 յուլիսի ժամը 21:10-ին, Տուշանպէէն Պոլիս փոխադրուած են 254 տաճիկ զինեալներ, որոնցմէ 91-ը ՏԱՀԵՇ-ի միանալու համար արդէն տեղափոխուած են Իրաք:

Իրանեան լրատու գործակալութիւնը նաեւ հաղորդած է, որ մինչեւ այսօր Թրքական օդանաւային ընկերութիւնը շուրջ հազար տաճիկ զինեալ փոխադրած է Իրաք` ՏԱՀԵՇ-ի կազմին մէջ կռուելու համար: