Քեսապի Դէմ Յարձակումին Մէջ Թուրքիոյ Ուղղակի Մեղսակցութիւնը կը դատապարտուի Միջին Արեւելքի Հայ դատի գրասենեակի պատասխանատու Վերա Եագուպեանի կողմէ

\n

Քեսապի վերջին իրադարձութիւններուն մասին Միջին Արեւելքի Հայ դատի գրասենեակի պատասխանատու Վերա Եագուպեան «Սաութ Լուպնան» ձայնասփիւռի կայանին հետ ունեցաւ հարցազրոյց մը:

\n

Վ. Եագուպեան անդրադարձաւ քեսապահայութեան տարհանումին եւ դատապարտեց այդ իմաստով Թուրքիոյ ուղղակի մեղսակցութիւնը:

\n

«Զինեալներուն Քեսապ ներխուժումը պիտի չպատահէր, եթէ թրքական ուժերը դիւրացուցած չըլլային անոնց մուտքը: Ճիշդ է որ աւանին մէջ սպանդներ չեն գործուած, հակառակ շրջանառութեան մէջ ներկայիս դրուած ապատեղեկատուութեան, սակայն զինեալները, որոնք օտար ազգութիւններու կը պատկանէին, եկեղեցիներուն խաչերը քանդած են եւ կողոպտած քեսապցիներուն բնակարանները», ըսաւ Վ. Եագուպեան:

\n

Ան պատմական ընդհանուր ակնարկ մը կատարեց Քեսապ աւանին մասին` լուսարձակի տակ առնելով քեսապահայութեան տեղահանումի տարբեր հանգրուանները` յայտնելով, որ այս իրադարձութիւնները բնակչութեան յիշողութեան մէջ արթնցուցած են Թուրքիոյ հետ հայութեան դառն փորձառութիւնը:

\n

Քեսապահայութեան ճակատագիրին մասին հարցումի մը պատասխանելով` Վ. Եագուպեան ընդգծեց, որ հայութիւնը քարոզչական լայն արշաւի մը ձեռնարկած է`  ճնշում բանեցնելու միջազգային ընտանիքին վրայ, որպէսզի ան իր կարգին ստիպէ թրքական կողմին` Քեսապ խուժած զինեալները յետս կոչելու:

\n

Ան աւելցուց, որ հայութիւնը նաեւ կ՛ակնկալէ, որ սուրիական պետութիւնը ապահովէ իր քաղաքացիներուն` քեսապցիներուն անվտանգութիւնն ու ապահով տունդարձը:

\n

Քեսապահայ ծերունիներուն Թուրքիա տարուելուն մասին Եագուպեան ըսաւ, որ անոնք այն ծերունիներն են, որոնք մերժած են լքել աւանը, բայց զինեալները զանոնք խաբած են եւ Լաթաքիոյ փոխարէն տեղափոխած Թուրքիա:

\n

«Իսկ Թուրքիոյ դէմ հայութեան սանձազերծած հակաքարոզչական արշաւը  նեղ կացութեան մատնեց Թուրքիան, որ ստիպուեցաւ զանոնք ապահով հասցնել Վաքըֆ գիւղը», եզրափակեց Վ. Եագուպեան:

\n

Leave a Comment

You must be logged in to post a comment.