Հասան Ճեմալի նամակը՝ Հրանդ Տինքին եւ Սեւան Նշանեանին


 

 

Այս երկրին մէջ ապրելու, ողջ մնալու համար պէտք է տառապի՞լ…

 

Այս երկրին մէջ ապրելու, ողջ մնալու համար պէտք է տառապի՞լ…

Կիրակնօրեայ առաւօտ մը… Գորշ, մռայլ, ցուրտ եղանակ: Կ՛անձրեւէ: Ծովը մշուշապատ է: Համացանցին վրայ լուրեր կը կարդամ: Մէջս կը  է բողբոջէ անարդարութեան դէմ ըմբոստութիւնը: Այս յօդուածին մէջ երկրի մասին արտայայտութիւններ կան՝ մարդոց մեծ ցաւ պատճառող…

Անարդարութեան դէմ ըմբոստանալ:

Եւ յօդուած մը գրել։

Միայն այդքա՞նը:

Այսինքն՝ սա խղճի մաքրութիւն է:

Այդքա՞նը:

Չեմ գիտեր:

Սակայն ուրիշ ի՞նչ կրնամ ընել:

Յօդուածով ըմբոստանալ:

Կիրակնօրեայ առաւօտ մը…

Գորշ, մռայլ, ցուրտ եղանակ:

Կ՚անձրեւէ:

 Ծովը մշուշապատ է:

Համացանցին վրայ կը  կարդամ Մալաթիոյ «Զիրվէ» («Գագաթնակէտ») հրատարակչութեան դէմ կատարուած ահաբեկչական գործողութեան մասնակից՝ կասկածեալներու ազատ արձակման մասին լուրերը: (2007 թուականի Ապրիլ 18-ին հրատարակչութեան դէմ իրականացուած ահաբեկչութեան ժամանակ կտրել էին մէկ գերմանացիի, երկու թուրքի եւ երեք քրիստոնեայի վիզերը):

Միայն քրիստոնայ ըլլալու համար սպանուեցան

 

Բողոքական եկեղեցիներու միութիւնը հրատարակած է հետեւեալը`

Ապրիլ 18, 2007-ը Թուրքիոյ մէջ բնակող բողոքական քրիստոնեաներուն համար շատ ծանր օր եղած է: Այդ օրը «Զիրվէ»ի աշխատակիցներ` Նեճաթի Այտընի եւ Ուղուր Եուքսելի հետ  սպանուած է գերմանացի Թիլման Գեսքէն. Պարզապէս քրիստոնեայ ըլլալուն պատճառով, 5 երիտասարդներ,  ծանր տանջանքներու ենթարկելէ ետք զինք` կտրած են վիզը։ 

Ազատ արձակուած կասկածեալ մարդասպանները դատավարութիւններու ընթացքին սպանուածներու ընտանիքներուն, մամուլի ներկայացուցիչներուն եւ փաստաբաններուն բազմաթիւ անգամներ սպառնացած են:

Անոնց ազատ արձակման մասին որոշումը քրիստոնեայ շրջանակներուն մօտ տխրութիւն եւ արդարութեան նկատմամբ հաւատքի կորուստի  պատճառ հանդիսացած են:

Այսպիսի արդարութի՞ւն կ՚ըլլայ

 Կիրակնօրեայ  առաւօտ մը…

Կը կարդամ Էրհան Թունջելի (Հրանդ Դինքի սպանութիւննը ուղղորդողներէն)` ազատ արձակման եւ բանտէն դուրս գալէն ետք կատարած յայտարարութիւնները:

 Սիրելի Հրանդը հեռուներէն ձեռքով  նշան կու տայ:

Հաւանաբար ան ալ նոյնպէս կ՛ըմբոստանայ անարդարութեան դէմ: 

 Ռաքելի վշտալի դէմքը աչքիս առաջ է…

 Այսպիսի արդարութի՞ւն կ՚ըլլայ…

 Այն երկրին մէջ, ուր անարդարութիւնը այսքան տարածուած է, խաղաղութիւնն ու հանգստութիւնը ինչպէ՞ս կրնան թակել մեր դուռը…

 Այս երկրին մէջ, ուր ոճրագործները կը հերոսացնեն, ժողովրդավարութիւնն ու օրէնքի գերակայութիւնը ինչպէ՞ս կրնան հաստատուիլ…

Կ՛ըմբոստանամ:

Ներսս խաւար է:

Երբեւէ չե՞նք կրնար հանգիստ շնչել այս երկրին մէջ…

 

Բարի լոյս, եղբա՛յրս՝ Սեւան

 

Նշանեանի լուրերը  աչքիս  տակէն կ՚անցնեմ։ Էնգին-ի T-24-ի յօդուածը կը կարդամ:

– Քանի որ Սեւանը հայ է, հ՞ա…

Թորբալը բաց բանտի պահակներէն մէկը Սեւան Նիշանեանի վարկային քարտը գողցաւ: Գողութեան մասին մամուլը տեղեկացաւ: Սակայն գողին փոխարէն Սեւան Նշանեանը պատասխան տուաւ։ Նշանեանը  անմիջապէս Թորբալը բաց բանտէն Բուջա փակ բանտը տեղափոխեցին:   Սեւան Նիշանեանին հետ  կապուած նոր բանտին մէջ տեղի ունեցող ընթացիկ իրադարձութիւններուն մասին կը հաղորդէ մտերիմ ընկերը` Ալի Նեսինը:

«Հին, 60 հոգիի համար նախատեսուած բանտախուցին մէջ կը պահեն 103 հոգի, յաճախ ալ 130: Գետին փռուած, անբացատրելի աղտոտ սպիտակեղէնով անկողինին վրայ երեք հոգիով կը պառկին : Նշանեանին անկողին տրամադրումը դժգոհութիւն կը յառաջացնէ բանտին մէջ: Սակայն ան, ուրիշներուն աւելի գէշ դրութեան մէջ ըլլալը մատնանշելով, կ՛ըսէ` «լաւ եմ»: Գիշերը ջեռուցում չկայ, օդափոխութեան համար պատուհանը նոյնիսկ չեն բանար: Տրուող սնունդը անհնար է ուտել: Բանտախուցին մէջ սեղան-աթոռ չկայ: Այդ իսկ պատճառով անոնք  որոնք Սեւանին նման տեղ չունին, ամբողջ օրը նստելու տեղ չեն գտներ: Սակայն Սեւանը հերոսի պէս կը դիմակայէ այդ պայմանները : Երիտասարդ ժամանակ ալ  այդպիսին էր»: 

Կիրակնօրեայ առաւօտ մը, կ՚անձրեւէ:

Դէպի հեռուները կը պոռամ` բարի՛ լոյս, եղբա՛յրս՝ Սեւան:

Ձայնս կրնա՞յ լսել…

Այս երկրին մէջ ապրելու, ողջ մնալու համար պէտք է տառապի՞լ…

Հասան Ճեմալ

Թարգմանութիւնը՝ Արազ Գայմագամեանի


Leave a Comment

You must be logged in to post a comment.