Ղարաբաղեան Ազատամարտին Մասին Պատմող Ժապաւէնը Պիտի Ցուցադրուի Քաննի Մէջ

ԵՐԵՒԱՆ, «Նիուզ».– Քաննի շարժապատկերի փառատօնի ծիրին մէջ կազմակերպուող շարժապատկերի շուկային մէջ այս տարի պիտի ցուցադրուի հայկական արտադրութիւն հանդիսացող մէկ ժապաւէն՝ Ջիւան Աւետիսեանի արցախեան ազատամարտին մասին պատմող «Թեւանիկ» ժապաւէնը։ «Նիուզ»ի հետ ունեցած զրոյցին ընթացքին «Հայաստանի ազգային կինոկենտրոն»ի մամլոյ խօսնակ Ռուզան Բագրատունեան ըսած է, թէ կեդրոնը որոշ աջակցութիւն ցուցաբերած է բեմադրիչին, սակայն ժապաւէնը Քաննի մէջ ներկայացնելը անոր նախաձեռնութիւնն է:

 «Կինոկենտրոնը ապահովում է այնտեղ տաղաւար, որտեղ լինում են պրեզենտացիաներ, ցուցադրութիւններ, երեկոներ, հանդիպումներ եւ այլն», ըսած է ան։
Ռուզան Բագրատունեանի համաձայն՝ տակաւին այլ դիմումներ չկան Քաննի փառատօնի կամ շարժապատկերի շուկայի մասնակցութեան վերաբերեալ, բայց թերեւս ըլլան, «դեռ շուտ է»:

 «Նիուզ»ը կապ հաստատած է նաեւ «Թեւանիկ»ի բեմադրիչ Ջիւան Աւետիսեանի հետ, որ դիտել տուած է, թէ «Կինոկենտրոն»ը ժապաւէնի համարտադրողն է, սակայն Քաննի շուկային մէջ ժապաւէնը պիտի ներկայացուի իր նախաձեռնութեամբ: Դահլիճը, ուր պիտի ցուցադրուի ժապաւէնը, Ջիւան Աւետիսեանը վարձած է:
«Թեւանիկ»ը 80 վայրկեան տեւողութեամբ հայկական ժապաւէն է, որ կը պատմէ Ղարաբաղեան ազատամարտին մասին:

«Հայ Նիուզ» կը գրէ, որ խոնաւութիւն, մթութիւն, հողաշէն նկուղ, ցորենի արտի մէջ ցորեն հաւաքող երեխաներ, լացող աչքեր, անվերջ սպասում՝ այս 0.1 առ հարիւրն է այն ամէնուն, որ կը պատկերացնէ բեմադրիչ Ջիւան Աւետիսեան՝ պատերազմի մասին մտածած ատեն։

«Ես պատերազմի դաշտի վրայ չեմ եղած։ Ես կը պատկերացնեմ, այն պատերազմը, որ տեսած եմ ու զգացած՝ մաշկիս վրայ։ Յուսալքուած հայացքներ, արիւնոտ վիրակապեր… Մանկութեանս տարիներուն հագած եմ ծունկերը կարկտած տաբատ»։

Աւարտական փուլի մէջ են արցախցի բեմադրիչ Ջիւան Աւետիսեանի՝ արցախեան հերոսամարտին նուիրուած երկրորդ շարժանկարի՝ «Թեւանիկ»-ի աշխատանքները։

«Թեւանիկ»-ի դիպաշարը բեմադրիչին փոխանցած է իր դասախօսը՝ Լեւոն Աթոյեան։ Դիպաշարը գրուած է 1996-1997 թուականին։ Շարժանկարը ստեղծուած է Առնոլտ Աղապապովի «Թեւանիկ» կարճ շարժանկարի դիպաշարի հիման վրայ, որուն հեղինակ Կարինէ Խոդիկեանի հետ միասին Ջիւան Աւետիսեանը «Թեւանիկ»-ի դէպքերուն վրայ աւելցուց երկու պատանիի՝ Արամի եւ Աստղիկի պատմութիւնը։ 80 վայրկեանի ընթացքին կը ներկայացուի 3 պատանիներու պատմութիւն, որոնց միջոցով բեմադրիչը փորձած է ներկայացնել հազարաւոր մարդոց բեկուած ճակատագրերն ու մարդկային ապրումները։

Շարժանկար ստեղծելով եւ, առհասարակ, բեմադրիչի մասնագիտութիւնը ընտրելով՝ Ջիւան Աւետիսեան նպատակ ունեցած է մարդոց մօտ յառաջացնել ապրելու ցանկութիւն՝ գնահատելով այն ամէնը, ինչ տրուած է մարդուն՝ պատերազմ, ցաւ, արհաւիրք։ Շարժանկարը ստեղծուած է ներկայացնելու կեանքը ամէն վայրկեանի մէջ, կեանքը ամէն ծաղկաթերթիկի հետ։

Բերմադրիչի հաւաստմամբ դերասանները յաջողած են ներկայացնել պատերազմը։ Բացի հայ դերասաններէն՝ իր դերակատարութեամբ Ջիւան Աւետիսեանին հիացուցած է նաեւ Պիէլոռուսիայէն Ռեկինա Պուտնիքը։

Շարժանկարը պիտի ներկայացուի թոյլտուութեամբ եւ ելեւմտական աջակցութեամբ՝ Հայաստանի ազգային շարժանկարի կեդրոնի, որ մեծապէս նպաստած է շարժանկարի ստեղծման։

Շարժանկարը հանդիսատեսին պիտի ներկայացուի Մայիս 2014-ին։
«Թեւանիկ»-ի մասին տեսանիւթը դիտել հոս՝

http://www.youtube.com/watch?v=1D5eVt87nxQ