Նիկոլի Հետ Մեր Պետութիւնը Դատապարտուած Է Կործանման

Դեկտեմբեր 21-ին հայրենիքի փրկութեան շարժումի համակարգող, ՀՅԴ Հայաստանի Գերագոյն մարմինի ներկայացուցիչ Իշխան Սաղաթէլեան կատարեց հետեւեալ յայտարարութիւնը.

Պատերազմի եւ դրա խայտառակ պարտութեան հետեւանքով աննախադէպ աւելացել են երկրի ընկերային եւ առողջապահական ծախսերը:

Մօտ ապագայում արդէն անհնար կը դառնան կենսաթոշակների, նպաստների, պետական աշխատավարձերի վճարումները:

Մինչ այդ`

պետական պիւճէ եկամուտների կրճատումը շարունակւում է,

կայուն աճում է երկրի արտաքին եւ ներքին պարտքը,

կտրուկ նուազել է երկրի տնտեսական աշխուժութիւնը,

արձանագրուել է երկրից դրամագլուխի աննախադէպ արտահոսք,

արժեզրկւում է մեր երկրի ազգային արժոյթը,

առաջին անհրաժեշտութեան ապրանքների գներն աճում են, իսկ մարդկանց եկամուտները` նուազում,

արդէն իսկ առաջնային են դարձել ժողովրդի գոյատեւման, պարենային անվտանգութեան խնդիրները,

Յառաջիկայում սպասվում է գազի, ուժանիւթի եւ փոխադրամիջոցի սակագների բարձրացում:

Համատարած ձախողումների այս կշռոյթով մօտ ապագայում բնակչութեան կէսն աղքատ է դառնալու` արագ կշռոյթով աճում են գործազրկութիւնը, ապագայի հանդէպ անորոշութեան զգացումն ու բացասական սպասումները:

Կործանարար այս ընթացքի կասեցումը, ծառացած խնդիրների հետեւողական լուծումները պահանջում են դրանց հիմնապատճառի եւ ձախողումների թիւ մէկ պատասխանատու Նիկոլ Փաշինեանի հեռացումը պաշտօնից:

Առանց Նիկոլի մենք ունենք փրկութեան հնարաւորութիւն, Նիկոլի հետ մեր պետութիւնը դատապարտուած է կործանման: Առաջնորդուել պէտք է բացառապէս այս տրամաբանութեամբ:

ՀՅԴ ՀԱՅԱՍՏԱՆԻ ԳԵՐԱԳՈՅՆ ՄԱՐՄՆԻ ՆԵՐԿԱՅԱՑՈՒՑԻՉ
ԻՇԽԱՆ ՍԱՂԱԹԷԼԵԱՆ

Leave a Comment

You must be logged in to post a comment.