«Ներկայացրէք նոր բացուած այս 50 հազար աշխատատեղերին վերաբերող տեղեկանք»․«Ժառանգութիւն»-ը՝ Նիկոլ Փաշինեանին
«Ժառանգութիւն» կուսակցութիւնը բաց նամակ յղած է ՀՀ վարչապետ Նիկոլ Փաշինեանին, որուն մէջ կ՚անդրադառնայ 50 հազար նոր աշխատատեղ ստեղծելու մասին վարչապետին յայտարարութեան:
Բաց նամակին մէջ մասնաւորաբար նշուած է.
«Յարգելի՛ պարոն վարչապետ, Ապրիլի 11-ին ելոյթ ունենալով ԵԽԽՎ (Եւրոպայի Խորհուրդի Խորհրդարանական Վեհաժողով) գարնանային նստաշրջանի լիագումար նիստում՝ Դուք յայտարարեցիք, որ Ձեր իշխանութեան օրօք Հայաստանի Հանրապետութիւնում ստեղծուել է 50 հազար աշխատատեղ։ Սա չափազանց պատասխանատու եւ մեր պետութեան ու քաղաքացու համար մեծ կարեւորութիւն ունեցող պնդում է, որից էապէս կախուած է հայրենի կառավարութեան սոցիալական քաղաքականութեան հանդէպ վստահութեան աստիճանը:
«Ժառանգութիւն» կուսակցութիւնը, որպէս ՀՀ քաղաքացու տեղեկացուածութեան եւ իրազեկման սահմանադրական իրաւունքի հետեւողական պաշտպան, խնդրում եւ պահանջում է, որ Դուք ներկայացնէք նոր բացուած այս 50 հազար աշխատատեղերին վերաբերող տեղեկանք, որն, ըստ ամենայնի, Ձեզ համար արդէն պէտք է կազմած լինէին կառավարութեան պատկան ատեանները:
Մենք ՀՀ վիճակագրութեան կոմիտէի հրապարակուած նիւթերում չգտանք հաւաստումը Ձեր նշած նորայայտ աշխատատեղերի, աւելին՝ Փետրուար ամսուայ պաշտօնական տուեալներով՝ Հայաստանում աշխատունակ բնակչութեան 20,8%-ը՝ 228,8 հազար մարդ գործազուրկ է, որը նախորդ ամիսներին արձանագրուած ցուցանիշերից գրեթէ չի տարբերւում:
Արդիւնաբերութեանը եւ տնտեսութեան այլ ոլորտներին վերաբերող վերլուծականներն էլ փաստում են, որ շատ ճիւղերում, մասնաւորապէս՝ մետաղագործութեան եւ հանքարդիւնաբերութեան մէջ, ունենք ցուցանիշերի ակնյայտ անկում, որը բնականաբար ուղեկցուել է աշխատատեղերի փակմամբ:
Լիայոյս ենք, որ ի հաստատումն Ձեր ղեկավարած կառավարութեան աշխատանքի թափանցիկութեան հռչակուած սկզբունքի, կը հրապարակէք տեղեկանք, որից ՀՀ քաղաքացիների համար պարզ կը դառնայ, թէ քանի աշխատատեղ է իրականում բացուել, տնտեսութեան որ ոլորտներում է գրանցուել նման առաջընթաց: Ինչպէս նաեւ ակնկալում ենք համապատասխան տեղեկատուութիւն, թէ որքան աշխատատեղ է փակուել ձեր կառավարութեան գործունէութեան ընթացքում:
Հասարակութեանը կողմնորոշելու հրապարակային այլ մեթոտները համոզիչ չեն, եւ չեն կարող ՀՀ քաղաքացիների բոլոր շերտերի համար բացայայտել, թէ որքանով է արդիւնաւէտ տնտեսական յեղափոխութեան նոր քաղաքականութիւնը բնակչութեան զբաղուածութեան ոլորտում:
Ակնկալելով Ձեր պատասխանը, հարկ ենք համարում յիշեցնել, որ ՀՀ նախորդ իշխանութիւնները եւս տրւում էին իրականութեան առասպելականացման գայթակղութեանը, ինչպէս, օրինակ, Սերժ Սարգսեանը, որը յայտարարում էր Հայաստանում 4 մլն. բնակչութեան տեսլականը, տնտեսական աճի բարձր տեմպերը, բայց այդ առասպելականացումը յանգեցրեց նրանց իշխանութեան վարկաբեկմանը եւ, ի վերջոյ, ժողովրդական յեղափոխութեանը»: