«Մի պետութեան, որն արդէն մէկ տարուց աւելի է՝ դադարել է գոյութիւն ունենալ». Վարուժան Գեղամեան

Պ.Գ.Թ., թուրքագէտ Վարուժան Գեղամեանը տելեգրամի իր ալիքում գրում է.

«Երէկ Թուրքիայի ռազմաքաղաքական ղեկավարութիւնը հերթական անգամ միջամտել է Հայաստանի ներքին գործերին. արտգործնախարար Չաւուշօղլուն ոչ միայն խոստովանել է, որ ազգային ուժերը խանգարում են, որպէսզի Հայաստանի՝ «առանց նախապայմանների բանակցութիւններ» անուան տակ նախապատրաստուող նոր կապիտուլեացիան արագ ստորագրուի, այլեւ որակաւորել է փողոց դուրս եկած տասնեակ հազարաւոր հայ մարդկանց որպէս «ծայրայեղականներ» (էքստրիմիստներ)։

Բնական է, որ ազգային ուժերը Թուրքիայի եւ Ադրբեջանի համար թշնամի են։ Բայց երբ ՀՀ դէ ֆակտօ իշխանութիւնները գոնէ ձեւական չեն արձագանգում այս բացայայտ միջամտութեանը՝ պաշտպանելու ՀՀ անձնագիր կրող սեփական քաղաքացիներին, լաւ առիթ է եւս մէկ անգամ արձանագրելու, որ գործ ունենք ոչ թէ հայկական իշխանութեան, այլ կոլաբորացիոնիստական (այլ բառերով՝ թշնամու հետ համագործակցող) դէ ֆակտօ իշխանութեան հետ։

Եթէ կապիտուլեանտները շարունակեն մնալ իշխանութեան, մեզ՝ հայերիս ու ՀՀ քաղաքացիներիս չեն պաշտպանելու նաեւ յետայսու, երբ, օրինակ, գերի վերցնեն որեւէ մէկին։

Չէք հաւատո՞ւմ։ Յիշէք հարիւրից աւելի այն տղաներին, ովքեր արդէն մօտ երկու տարի է Բաքուի բանտում են եւ որոնց «կարգավիճակը» կապիտուլեանտն ու իր խմբաւորումը իջեցրել են «ռազմագերուց» մինչեւ «Ադրբեջանում պահուող անձինք», ինչ իր հերթին զրկել է վերջիններիս իրաւական լրացուցիչ պաշտպանութիւնից ու ոչ մէկ չի էլ յիշում իրենց մասին։ Աւելին, իրենք նոյնիսկ պաշտօնական հաշուարկում չկան։

Շնորհաւոր Հայաստանի Հանրապետութեան Սահմանադրութեան տօնը, մի պետութեան, որն արդէն մէկ տարուց աւելի է՝ դադարել է գոյութիւն ունենալ։

Սա թշնամու՝ ՀՀ գործերին միջամտելու առաջին դէպքը չէ»։

Leave a Comment

You must be logged in to post a comment.