Իրանը՝ Թուրքիայի լարախաղացութեան անխուսափելի պատնէշ․․․

Թեհրանեան եռակողմ հանդիպմանը (առաջինն կայացել է 3 տարի առաջ) Թուրքիան հիմնական օրակարգ՝ Սիրիայի խնդրում այս անգամ էլ մնաց ձեռնունայն։ Հարցն այն է, որ ինչպէս նախորդ եռակողմում, այս անգամ էլ Իրանի ու Ռուսաստանի Դաշնութեան մօտեցումները Սիրիայի մասով գրեթէ ամբողջապէս համընկնում էին իրար, հակառակ Թուրքիայի, որն ստիպուած հանդէս եկաւ ընդհանուր՝ այսպէս ասած՝ հակաահաբեկչական պայքարում միւս երկու երկրներին համագործակցութեան հրաւիրելը…

Յատկապէս Իրանի Իսլամական Հանրապետութեան (ԻԻՀ) հոգեւոր առաջնորդի Սիրիայի հարցով բարձրաձայնած շեշտադրումները ինքնին յստակեցնում են Իրանի անբեկանելի կողմնորոշումը այդ խնդրում, որն ինչպէս ասւեց՝ աւելի շատ աղերս ունէր Ռուսաստանի դիրքորոշումների հետ…

Յատկանշելի է, որ ինչպէս միշտ Թուրքիայի լարախաղաց դիւանագիտութիւնն Իրանի դէպքում անխուսափելիօրէն պատնէշւում ու վրիպում է, մանաւանդ եթէ միջամուխ է լինում (յատկապէս այժմուայ տարածաշրջանային գլոբալ ճգնաժամի ֆոնին) հոգեւոր առաջնորդը՝ որպէս գերագոյն ղեկավար ԻԻՀ արտաքին քաղաքականութեան դիրքորոշումներում…,- «Սիրիայի տարածքային ամբողջականութեան պահպանումը շատ կարեւոր է եւ մենք դէմ ենք Սիրիայի Հիւսիսում ռազմական գործողութիւն սկսելուն… Այդ գաղափարն անպայման կը վնասի ինչպէս Սիրիային, այնպէս էլ Թուրքիային, ինչպէս նաեւ ողջ տարածաշրջանին…»,- ընդգծել է Խամենէին:

Գալով Էրդողանեան ըստ էութեան 2-րդ շոկային իրավիճակին, որն, անշուշտ դարձեալ այաթ. Խամենէիի բաց տեքստով յայտարարելու արդիւնքն էր, դա «ՀԱՅ-ԻՐԱՆԱԿԱՆ հազարամեակների սահմանի եւ կենսական հաղորդակցուղու» գերկարեւորումն էր, եւ որպէս կարմիր գիծ դա անձեռնմխելի լինելու առումով, որն ոչ աւել-ոչ պակաս թիրախաւորեց ըստ էութեան Պանթուրքիստական ու Պանթուրանական վերստին գլուխ բարձրացրած թուրք-ադրբեջանական նկրտումներին…

Յուսանք, որ Արցախեան 44-օրեայի հետևանքով ձեւաւորւած թուրք-ադրբեջանական չարիքի դաշինքը գոնէ այս անգամ չի համարձակուի նոր սադրանքների ու դաւադրութիւնների բեմականացմանը, չնայած նման դէպքերում իր լարախաղացութեան նշաձողը ուղղում է ինչպէս երբեւէ՝ դէպի ՆԱՏՕ, Իսրայէլ, Եւրոմիութիւն ու ընդհանրապէս ԻԻՀ-ին հակադրւող ճամբարներ։

ԴԵՐԵՆԻԿ ՄԵԼԻՔԵԱՆ

Leave a Comment

You must be logged in to post a comment.