Գիւղատնտեսութեան նախարար Արթիւր Խաչատրեան. «Մենք այս կառավարութեան մէջ ընդգծուած ձախ ենք»
Գիւղատնտեսութեան նախարար Արթիւր Խաչատրեանը պատմում է, որ տնտեսական քաղաքականութեան շատ հարցերում իրենք ունեն իրենց մօտեցումները
(«Առաւօտ») – Գիւղատնտեսութեան նախարար Արթիւր Խաչատրեանը ՀՅԴ-ի կազմակերպած սոցիալ-տնտեսական քաղաքականութեան մասին հանրային քննարկման ժամանակ յայտարարեց, որ վերջին տարիներին տնտեսութիւնն անշեղօրէն աճել է, բայց երբ որ խօսում են տնտեսական աճի մասին, մարդիկ զայրացած իրենց են նայում, որովհետեւ հասարակութիւնը բեւեռացուած է: Ըստ նրա՝ տնտեսութիւնն անշեղօրէն աճում է, բայց ունենք արտագաղթ, որովհետեւ կայ անարդարութիւն: «Առաւօտի» հետ զրոյցում հարցին՝ եթէ սա ասէր վերջին տարիներին ընդդիմութիւն եղած, իշխանական կոալիցիայի մաս չկազմած կուսակցութեան ներկայացուցիչ, ինչ-որ չափով հասկանալի կը լինէր, բայց եթէ ՀՅԴ-ն ունեցել է պորտֆելներ, ունեցել է լծակներ՝ ազդելու իշխանական որոշումների վրայ, ինչո՞ւ չի արել այս տարիներին, նախարարը պատասխանեց. «Մենք նախկին նախագահի հրաւէրքով 2016-ին, հասկանալով իրավիճակի օրհասականութիւնը, անդամակցեցինք կառավարութեանը: Եթէ դուք նայէք մեր նախարարների գործունէութիւնը, ապա ընդգծուած ձախակողմեան է եղել: Մենք միշտ էլ ասել ենք՝ պէտք է ստեղծել մեխանիզմներ, որոնք կարող են ստեղծուած արժէքը ճիշդ վերաբաշխել հասարակութեան անդամների միջեւ: Այս կառավարութիւնում էլի մենք ունենք 2 նախարար, ու էլի մենք այս կառավարութեան մէջ ընդգծուած ձախ ենք, նոյնիսկ կառավարութեան նիստերի ժամանակ էլ կը տեսնէք, որ մենք խօսում ենք, որ փոքր ձեռնարկատէրերին պէտք է պաշտպանենք, երբ հարցը գնաց 115-ից 58 մլն.-ի իջեցնելուց, նաեւ երբ խօսք էր գնում տեղական արտադրողների նկատմամբ պրոտեկցիոնիստական քաղաքականութեան իրականացման մասին, այստեղ էլ էլի կը տեսնէք, որ ռեպլիկների տեսքով մենք ցոյց ենք տալիս՝ որոնք են մեր մօտեցումները: Բայց պէտք է հասկանանք՝ կայ կառավարութիւն, կայ կառավարութեան մեծամասնութիւն, ուղղակի մենք այն կառավարութեան մէջ էլ, այս կառավարութեան մէջ էլ ընդգծուած ձախակողմեան քաղաքականութիւն ենք իրականացրել:
Բայց միջոցները սահմանափակ են: Եթէ մենք ունենանք ամբողջական իշխանութիւն ինչ-որ մի պահի, կը տեսնէք, որ մենք մեր ուղղուածութիւնը շարունակում ենք»: Գիւղնախարարն ասաց, որ երբ իրենք խօսում են ստեղծուած արժէքի բաշխման մասին, դա նաեւ աշխատատար ճիւղերի զարգացմանն է վերաբերում. «Նպաստի փոխարէն, երբ մարդը նպաստ է ստանում, աւելի լաւ է գնա աշխատատար ցածր մարժայով ձեռնարկութիւնում աշխատի, բայց գումար ստանայ, որ չեղած տեղից փող ստանալու այդ մշակոյթը դուրս գայ: Ընտանիքը եթէ 20 տարի նստած է սոցիալական համակարգի վրայ, ուրեմն այդ սոցիալական համակարգն ինչ-որ մի տեղ խաթարուել է»: Մեր դիտարկմանը, որ մինչ նպաստառուների ցուցակից մարդկանց հանելը պէտք է նախ աշխատատեղեր ստեղծուեն՝ Արթիւր Խաչատրեանն արձագանգեց. «Հենց դա ենք ասում՝ պետութիւնը պէտք է իր վրայ վերցնի աքթիւ գործառութիւններ: Ծայրայեղ դէպքերում կա՛մ ինքը կարող է ձեռնարկութիւններ ստեղծել, կա՛մ պետութիւն-մասնաւոր հատուած գործընկերութեան շրջանակներում ձեռնարկութիւն լինի: Կայ մեծ կառավարութեան գաղափարախօսութիւն, կայ՝ փոքր: Փոքրն ասում է՝ ես ձեռքերս լուանում եմ, շուկան ինքն իրեն կը կարգաւորուի, եթէ մեծ ձախողումներ են լինում, այդ դէպքում թիրախային ինտերվենցիա եմ անում, եւ կայ միւս մօտեցումը, որն ասում է՝ պետութիւնը պատասխանատու է տնտեսութեան համար, պետութիւնը պատասխանատու է ժողովրդի համար եւ սոցիալական բարեկեցութեան համար, աքթիւ քայլեր է ձեռնարկում: Մենք ասում ենք, որ պէտք է այնքան շուկայ, որքան հնարաւոր է, եւ այնքան միջամտութիւն, որքան անհրաժեշտ է, մենք խրախուսում ենք մրցակցութիւնը, բայց եթէ տեսնում ենք, որ մրցակցութեան արդիւնքում բացեր են առաջանում՝ ձեռնարկութիւններ չեն ստեղծւում, ձեռնարկութիւնները Երեւանի կենտրոնում են ստեղծւում, այդ դէպքում արդէն անմիջականօրէն պէտք է մասնակցել»: