Պահանջում ենք վարչապետի անցնցում հեռացումը. 17 կուսակցութիւնների միասնական յայտարարութիւնը

Հայ ժողովուրդը, խորհրդարանական եւ արտախորհրդարանական քաղաքական ուժեր, մեկտեղել են իրենց կարողականութիւնը՝ դիմագրաւելու հայկական երկու պետութիւններին ուղղուած թուրք-ադրբեջանական ագրեսիան:

Պատերազմական այս օրերին քաղաքական, դիւանագիտական եւ ռազմական ճակատներում բեկում մտցնելու յորդորով իշխանութիւններին ենք ներկայացրել բազմաթիւ առաջարկութիւններ, այդ թւում իրավիճակի շտկմանն ուղղուած հանդիպումների առաջարկներ, որոնք մնացել են անպատասխան եւ չիրագործուած:

Պատերազմը սաստիկ է, կորուստներն՝ անդառնալի եւ ծանր: Որպէս պետութիւն եւ ժողովուրդ կանգնած ենք ճակատագրական հանգրուանի առջեւ, որը պահանջում է վճռական որոշումներ եւ գործողութիւններ: Մինչդեռ, քաղաքական իշխանութիւնների ձեռնարկած քայլերը համարժէք չեն մեր ժողովրդին ուղղուած գոյապահպանական սպառնալիքին:

Այս ընթացքում իշխանութիւնն ի ցոյց դրեց իր բացայայտ անկարողութիւնը, ներքին եւ արտաքին մարտահրաւէրները դիմակայելու անընդունակութիւնը: Մարդկային եւ տարածքային կորուստները, Հայաստանի դաշնակիցների եւ առաջին հերթին Ռուսաստանի Դաշնութեան հետ ոչ լիարժէք յարաբերութիւններն ակնյայտ են դարձնում գործող իշխանութեան սնանկութիւնը:

Այս իրավիճակի ողջ պատասխանատուութիւնը կրում են քաղաքական իշխանութիւնները, որոնք չձերբազատուեցին անսխալականութեան իրենց բարդոյթից՝ հայկական երկու պետութիւնները կանգնեցնելով ծանր իրողութիւնների, իսկ Արցախը՝ նաեւ տարածքային լրջագոյն կորուստների առջեւ: Ուստի, իշխանութիւնները զրկուել են հայ ժողովրդին ներկայացնելու քաղաքական եւ բարոյական հիմքերից:

Անդառնալի կորուստները կանխելու համար, պահանջում ենք՝

ստեղծուած աղետալի վիճակի համար պատասխանատու վարչապետ Փաշինեանի եւ նրա կառավարութեան ժամ առաջ, ինքնակամ եւ անցնցում հեռացումը,
իրավիճակում բեկում մտցնելու կարողութիւն ունեցող եւ ռազմաքաղաքական խնդիրներ լուծող գործադիր իշխանութեան նոր մարմնի հրատապ ստեղծումը:

Սիրելի հայրենակիցներ,

օրհասական այս պահին մեր պահանջը թելադրուած է հայկական երկու պետութիւնների լինելիութեան հրամայականով եւ այն վստահութեամբ, որ նոր իրավիճակում հայոց անկոտրում բանակն ու միասնական հայ ժողովուրդն ի զօրու են յաղթական ճեղքում ապահովել ռազմաճակատում:

1
«Ազատութիւն» կուսակցութիւն
2

«Ազգային անվտանգութիւն» կուսակցութիւն
3
«Ազգային օրակարգ» կուսակցութիւն
4

«Ազգային ժողովրդավարական միութիւն» կուսակցութիւն
5
«Ազգային համաձայնութիւն» կուսակցութիւն
6
«Ալեանս առաջադիմական ցենտրիստական» կուսակցութիւն
7
«Բարգաւաճ Հայաստան» կուսակցութիւն
8
«Դեմոկրատական այլընտրանք» կուսակցութիւն
9
«Երկիր Ծիրանի» կուսակցութիւն
10
«Հայ Յեղափոխական Դաշնակցութիւն» կուսակցութիւն
11
«Համերաշխութիւն» կուսակցութիւն
12
«Հայաստանի ժողովրդավարական ազատական միութիւն» կուսակցութիւն
13
«Հայաստանի Հանրապետական» կուսակցութիւն
14
«Հայաստանի քրիստոնեայ-դեմոկրատական միութիւն» կուսակցութիւն
15
«Հայրենիք» կուսակցութիւն
16
«Մեկ Հայաստան» կուսակցութիւն
17
«Սահմանադրական իրաւունք միութիւն» կուսակցութիւն

09.10.2020 թ.
Հ.Գ. Յայտարարութիւնը բաց է միանալու համար:

Leave a Comment

You must be logged in to post a comment.