Հայաստանի Եւ Արցախի Պատուաստումներու Ծրագիրին Աջակցող Բարերար Րաֆֆի Արտալճեանի Կը Պարգեւատրուի

ԵՐԵՒԱՆ, «Նիուզ».– Հայաստանի Հանրապետութեան առողջապահութեան համակարգին անշահախնդիր օգնութիւն ցուցաբերելու, մեծ ներդրումներու, երկար տարիներու հայրենանուէր գործունէութեան, ինչպէս նաեւ «Անի եւ Նարօտ յիշատակի հիմնադրամ»ի կազմաւորման 20ամեակին առիթով հիմնադիր-ղեկավար Րաֆֆի Արտալճեան պարգեւատրուեցաւ Հայաստանի առողջապահութեան նախարարութեան յուշամետալով:

Նախարարի տեղակալ Սերգէյ Խաչատրեանը շնորհակալութիւն յայտնեց Րաֆֆի Արտալճեանին՝ Հայաստանի առողջապահական համակարգին ցուցաբերած շարունակական աջակցութեան համար: «Ուրախ ենք, որ այստեղ էք: Անգնահատելի է ձեր ներդրումը առողջապահական համակարգի զարգացման՝ մասնաւորապէս պատուաստանիւթերի ներդրման գործընթացում ակտիւ մասնակցութիւնը», ըսաւ Սերգէյ Խաչատրեան:

Րաֆֆի Արտալճեան շնորհակալութիւն յայտնելով պարգեւին համար՝ նշեց, որ ինք, կարծես, Հայաստանի դեսպանն է աշխարհի մէջ: Ան յիշատակեց սփիւռքահայ բազմաթիւ բարերարներու անուններ, որոնք տարբեր տարիներու եղած են Հայաստանի կողքին՝ աջակցելով հայրենիքին ամէնէն դժուար օրերուն, նպաստելով տարբեր ոլորտներու զարգացման:

Հանդիպման ընթացքին քննարկուեցան համագործակցութեան հետագայ ծրագիրները: Անդրադարձ կատարուեցաւ դիմադրողականութեան եւ հիւանդութիւններու կանխարգիլման ազգային ծրագիրի իրականացման գործին մէջ Հայաստանի յաջողութիւններուն:

Նշենք, որ «Անի եւ Նարօտ յիշատակի հիմնադրամ»ը հիմնուած է Րաֆֆի Արտալճեանի կողմէ՝ ի յիշատակ 1994 թուականին օդանաւային արկածով զոհուած կնոջ եւ դստեր: Հիմնադրամը իր կազմաւորման օրէն օգնած է Հայաստանի Հանրապետութեան եւ Լեռնային Ղարաբաղի Հանրապետութեան ժողովուրդին՝ իրականացնելով ընկերային եւ հանրային առողջապահութեան բնագաւառի բարելաւման ծրագիրներ: