Գէորգ Արապեանի բարերարութեամբ հայկական դպրոց կը հիմնուի Փարիզի մէջ


Յուլիս 4-ին Փարիզի մերձակայ Ալֆորվիլ քաղաքին մէջ տեղի պիտի ունենայ «Գէորգ Արապեան» կրթօճախի բացման արարողութիւնը, որուն պիտի մասնակցին Հայաստանի վարչապետ Յովիկ Աբրահամեան,  Ֆրանսայի վարչապետ Մանուէլ Վալս, Փարիզի եւ Ալֆորվիլի քաղաքապետները եւ վարժարանի գլխաւոր բարերար Գէորգ Արապեան:  Այս մասին կը հաղորդէ «Հայերն այսօր»ը:

Կրթօճախի կառուցումը իրականութիւն  դարձած է Ֆրանսայի Հայոց թեմի նախկին առաջնորդ եւ APCAF-ի (Ֆրանսայի հայ մշակոյթի զարգացման հիմնադրամ) նախագահ Նորվան Արք. Զաքարեանի նախաձեռնութեամբ: Շինարարութեան հիմնական ծախսերը յանձն  առած է պէյրութահայ Գէորգ Արապեան:

Վարժարանի կառուցումը սկսած է 2013-ին: Ճարտարապետական աշխատանքները իրականացուցած է «Յակոբեան» ճարտարապետական գրասենեակը: Եռայարկ վարժարանի ամբողջական մասկերեսը 1585 քառ. մեթր է: Վարժարանէն ներս պիտի գործէ նախակրթարան եւ միջնակարգ դպրոց:

Նորվան Արք. Զաքարեանի խօսքերով, դպրոցական այս գեղեցիկ շէնքը, հայ ժողովուրդին պատիւ բերող գեղեցկութեամբ, Ալֆորվիլ քաղաքի զարդերէն մէկը պիտի ըլլայ, հայերէնի ուսուցման փարոս` Սէն գետի ափին:


Leave a Comment

You must be logged in to post a comment.