Կորցնելով Արցախը՝ կորցնելու ենք մեր ինքնութիւնն ու արժանապատուութիւնը. Արցախի թեմի առաջնորդ

«Այսօր կանգնել Արցախի կողքին՝ կը նշանակի կանգնել մեր խղճի եւ արդարութեան կողքին, կանգնել քաղաքակրթութեան եւ մարդու իրաւունքների կողքին, հաւատարիմ մնալ Աստծոյ պատգամներին». Յուլիսի 25-ին Ստեփանակերտում եւ Երեւանում տեղի ունեցած համաժողովրդական հանրահաւաքի ժամանակ ասել է Հայ Առաքելական եկեղեցու Արցախի թեմի առաջնորդ Տէր Վրթանէս Եպիսկոպոս Աբրահամեանը:

«Բոլորս էլ քաջատեղեակ ենք, թէ ինչ է կատարւում Արցախում, ինչ խմորումներ են տեղի ունենում մեր հայրենիքի այդ սրբազան մասունքի շուրջ: Ինչպէս ժամանակին Խրիմեան Հայրիկն էր բնութագրում՝ հայկական հարցը՝ ճիշդ նոյն իրավիճակում ենք գտնում մենք. մի մեծ առեւտուր է ընթանում, Արցախը դրուած է վաճառքի, իսկ երկաթէշերեփաւորներն ախորժակները սրած սպասում են իրենց պատառին: Որքան էլ խաղաղութեան սին յոյսերի գինով հարբենք ու փորձենք մենք մեզ խաբել, դրանից իրականութիւնը չի փոխուի,եւ ինչպէս խրոնիկ հարբեցողի դէպքում է լինում՝ ամէն ինչ գնալու է դէպի կործանում: Արցախը ենթակայ չէ վաճառքի: Արցախը աստուածապարգեւ Հայաստան աշխարհի անմնացորդ մասն է: Արցախը սրբութիւն է: Արցախը պատմութիւն է եւ ժողովուրդ է», ընդգծել է Սրբազան հայրը՝ յաւելելով, որ Աստծոյ սիրոյ վրայ հիմնուած եղբայրասիրութիւնն ու հայրենասիրութիւնն են դառնալու այնքան անհրաժեշտ երկաթեայ շերեփը:

«Այսօրուայ իրականութիւնը գալիս է եւս մէկ անգամ մեզ յիշեցնելու, որ Արցախեան շարժումը չի աւարտուել եւ դեռ շարունակւում է: Այն մեզ համար պէտք է դառնայ հանապազօրեայ հացի պէս, դառնայ ապրելակերպ, առաքելութիւն, գաղափար եւ պայքար: Արցախեան շարժման ընթացքին հազարաւոր հայորդիներ հերոսացան, անմահացան եւ դարձան հզօր հոգեւոր մի բանակ, որոնց հոգեւոր հայեացքի ներքոյ մենք չպիտի սխալուենք,այլ ամբողջ ազգով դառնալով մէկ միասնական բռունցք, այդ շարժումը հասցնենք իր բարի աւարտին՝ ազատ, անկախ Արցախ: Այսօր Արցախն է հայի ինքնութեան եւ արժանապատուութեան շարժիչ ուժը: Կորցնելով Արցախը՝ կորցնելու ենք մեր ինքնութիւնն ու արժանապատուութիւնը», ասել է ՏէրՎրթանէսԵպիսկոպոս Աբրահամեանը:

Comments are closed.