ՀՅԴ Հայաստանի կազմակերպութեան 23-րդ Գերագոյն Ժողովի յայտարարութիւնը

Հայ Յեղափոխական Դաշնակցութիւնը՝ հաւատարիմ իր սկզբունքներին ու արժեհամակարգին, համահայկական կառոյցի զօրակցութեամբ, հետամուտ է Հայրենիքի հզօրացմանը, Հայաստանի եւ Արցախի Հանրապետութիւնների անվտանգութեան համակարգերի ամրապնդմանը, Հայրենիք-Սփիւռք փոխյարաբերութիւնների խորացմանը` համոզումով, որ միայն հանրային եւ համազգային համերաշխութեան պայմաններում է երկիրն ունակ դիմագրաւել ներազգային եւ արտաքին մարտահրաւէրները:

ՀՅԴ Հայաստանի կազմակերպութեան Գերագոյն Ժողովն արձանագրում է.

  1. 2018 թ. ժողովրդային շարժումով եւ արտահերթ խորհրդարանական ընտրութիւններով պայմանաւորուած՝ Հայաստանի ներքաղաքական կեանքը մտել է բազմաթիւ մարտահրաւէրների եւ անորոշութիւնների դիմագրաւման նոր շրջափուլ:
  2. Արցախի հարցում իշխանութիւնների խուսափողական քաղաքականութիւնը մտահոգիչ է եւ չի նպաստում հիմնախնդրի հանգուցալուծման շուրջ համազգային համախմբմանը։
  3. Ազգային, աւանդական, հոգեւոր, մշակութային արժէքների, պետական խորհրդանիշերի եւ հաստատութիւնների նկատմամբ ուղղորդուած հեղինակազրկման արշաւը, ինչպէս նաեւ ներազգային անհանդուրժողականութեան մթնոլորտը սպառնում են ազգային անվտանգութեանը եւ միասնականութեանը:
  4. Զարգացման ռազմավարական ծրագրերի բացակայութեան, անկանխատեսելի արտաքին քաղաքականութեան, ուղղորդուող արդարադատութեան, իշխանութիւնների որդեգրած գործելաոճի, կառավարման որակների, ինչպէս նաեւ հանրային կեանքի բոլոր ոլորտներում շօշափելի արդիւնքներ չարձանագրելու հետեւանքով զգալի է հանրային լաւատեսութեան անկման միտումը:

ՀՅԴ Հայաստանի կազմակերպութեան Գերագոյն ժողովը հաստատում է.

  1. ՀՅ Դաշնակցութիւնը՝ համահայկական կառոյցի իր ողջ ներուժով, շարունակելու է գործել «Զարգանալ` չզիջելով» ռազմավարական նպատակադրումով:
  2. Հաւատարիմ կուսակցութեան սոցիալիստական գաղափարախօսութեանը` Դաշնակցութիւնը հետամուտ է լինելու հանրային համերաշխութեան եւ ընկերային արդարութեան հաստատման հրամայականին:
  3. Որպէս ընդդիմադիր քաղաքական ուժ` Դաշնակցութիւնը շարունակելու է լուսարձակի տակ պահել կառավարութեան իրականացրած սոցիալ-տնտեսական քաղաքականութիւնը՝ հանդէս գալով որպէս աշխատաւորութեան, միջին խաւի եւ սոցիալապէս խոցելի խմբերի պաշտպան` հետեւողականօրէն պահանջելով կառավարութիւնից` Հայաստանում ապահովել սոցիալական պետութեան սահմանադրական պահանջի իրականացումը։

Դաշնակցութիւնը ստանձնում է ազգային, ժողովրդավարական, սոցիալիստական գաղափարական հենքով քաղաքական առանցք եւ իշխանութիւն ձեւաւորելու յանձնառութիւն՝ ի խնդիր ինքնիշխան, սոցիալական, իրաւական եւ ժողովրդավարական լիակատար պետութեան կայացման:

Leave a Comment

You must be logged in to post a comment.