Ատրպէյճանցի 5 քաղաքացիներ Հայաստանէն քաղաքական ապաստանեալի իրաւունք կը խնդրեն
Յունուար 30-ին ՀՀ արտաքին գործոց նախարարութիւնը, ինչպէս նաև Ազգային անվտանգութեան ծառայութիւնը (ԱԱԾ) հաստատած են վերջերս շրջանառուող լուրերը ատրպէյճանցի բազմանդամ ընտանիքին մասին, որ Հայաստանէն քաղաքական ապաստան խնդրած է։
ՀՀ ԱԱԾ-ի մամուլի հաղորդագրութեան համաձայն՝ Յունուար 29-ին հայ-վրացական սահմանի «Բագրատաշէն» հսկիչ-անցագրային կէտ դիմած է Ատրպէյճանի քաղաքացի, Պաքու քաղաքի բնակիչ, 1976-ին ծնած Ջավիդ Օրուջևը` իր, կնոջ և 3 մանկահասակ երեխաներուն համար քաղաքական ապաստան խնդրելով։
Ջավիդ Օրուջևը պատմած է, որ իր նկատմամբ ատրպէյճանական գաղտնի սպասարկութիւնները ճնշումները սկսած են հայկական արմատներով կնոջ` Պաքուի բնակիչ, 1983-ին ծնած Ռոյա Միրզոևայի հետ ամուսնանալէն ետք: Չդիմանալով հալածանքներուն՝ Օրուջևը պարտադրուած համաձայնած է համագործակցիլ Ատրպէյճանի գաղտնի սպասարկութիւններուն հետ, և կնոջ` արտասահման բնակող ազգականներուն միջոցով տուեալներ հայթայթել Հայաստանի և հայկական Սփիւռքի վերաբերեալ:
Օրուջև անյաջող փորձ կատարած է բնակութիւն հաստատելու եւրոպական երկիր մը, սակայն այդ երկրէն զինք արտաքսած են Պաքու, որմէ ետք աւելի խստացած են Ատրպէյճանի գաղտնի սպասարկութիւններու ճնշումները:
Յայտնուելով անելանելի կացութեան մէջ և հաշուի առնելով իր ընտանիքին սպառնացող վտանգը՝ Ջավիդ Օրուջևը որոշած է քաղաքական ապաստանեալի իրաւունք խնդրել Հայաստանի իշխանութիւններէն:
ՄԱԿ-ի հայաստանեան գրասենեակը և ՀՀ Միգրացիոն գործակալութիւնը ներկայիս կը զբաղին այդ ընտանիքի ճակատագրով: