Հայաստան եւ Մեծն Բրիտանիա ստորագրեցին պաշտպանական համագործակցութեան 2026-2027 ծրագիրը
- (0)
ԵՐԵՒԱՆ.- Հայաստան եւ Միացեալ Թագաւորութիւն ստորագրեցին պաշտպանական համագործակցութեան 2026-2027 թուականներու ծրագիրը՝ երկու երկիրներուն միջեւ զինուորական եւ անվտանգային յարաբերութիւններու զարգացման ուղղութեամբ։
Հայաստանի պաշտպանութեան նախարարութեան հաղորդագրութեան համաձայն, նոյեմբեր 4-ին Լոնտոնի մէջ տեղի ունեցան հայ-բրիտանական երկկողմ պաշտպանական խորհրդակցութիւններ, որոնց ընթացքին քննարկուեցան տարածաշրջանային եւ միջազգային անվտանգութեան առնչուող հարցեր, ինչպէս նաեւ պաշտպանական ոլորտի համագործակցութեան ներկայ վիճակն ու զարգացման հեռանկարները։
Խորհրդակցութիւններուն հայկական կողմը ներկայացուց պաշտպանութեան նախարարութեան պաշտպանական քաղաքականութեան եւ միջազգային համագործակցութեան վարչութեան պետ Լեւոն Այվազեան։
Հանդիպումներու ընթացքին կողմերը հաստատեցին, որ համագործակցութեան նոր ուղղութիւններ զարգացնելու զգալի ներուժ գոյութիւն ունի։ Քննարկումներուն արդիւնքով ձեռք բերուեցան համապատասխան պայմանաւորուածութիւններ, որոնց հիման վրայ ստորագրուեցաւ երկկողմ ծրագիրը։
Յաջորդ պաշտպանական խորհրդակցութիւնները նախատեսուած է կազմակերպել Երեւանի մէջ։
Հայաստան վերջին տարիներուն ընդլայնած է պաշտպանական յարաբերութիւնները արեւմտեան շարք մը երկիրներու հետ՝ փորձելով բազմազանեցնել իր միջազգային անվտանգային գործընկերութիւնները։
Հայ-բրիտանական համագործակցութեան նոր ծրագիրը այդ գործընթացին հերթական հանգրուանն է։ Սակայն հաղորդագրութեան մէջ չեն հրապարակուած ծրագրին ֆինանսական ծաւալը, նախատեսուած միջոցառումներուն ամբողջական ցանկը կամ հնարաւոր ռազմական-արհեստագիտական յանձնառութիւններուն մանրամասները։
Հայաստանի անվտանգային մարտահրաւէրներուն եւ սահմանային խնդիրներու պայմաններուն մէջ պաշտպանական նոր գործընկերութիւններու գործնական արդիւնաւէտութիւնը կը շարունակէ մնալ առաջնահերթ հարց մը։
Ստորագրուած փաստաթուղթին իրական նշանակութիւնը պիտի չափուի անոր գործադրութեամբ եւ Հայաստանի պաշտպանական կարողութիւններուն վրայ ունեցած ազդեցութեամբ։
