Փաշինեան․ Ընտրութիւններէն ետք պիտի այցելեմ Մոսկուա
- (0)
ԵՐԵՒԱՆ․- Նիկոլ Փաշինեան յայտարարեց, որ յունիսի 7-ի խորհրդարանական ընտրութիւններէն ետք պիտի այցելէ Մոսկուա՝ Ռուսիոյ նախագահ Վլատիմիր Փութինի հետ հանդիպելու եւ երկու երկիրներուն միջեւ առկայ հարցերը քննարկելու համար։
Գեղարքունիքի մարզի Մարտունի քաղաքին մէջ տեղի ունեցած նախընտրական հանդիպումի ընթացքին Փաշինեան ըսաւ, թէ Փութին իրեն հեռաձայնած է յունիսի 1-ին՝ ծննդեան տարեդարձը շնորհաւորելու համար, սակայն զրոյցին ընթացքին քննարկուած են նաեւ գործնական հարցեր։
«Համաձայնեցանք, որ ընտրութիւններէն ետք կրկին պիտի այցելեմ, պիտի հանդիպինք եւ պիտի լուծենք ընթացիկ հարցերը», ըսաւ ան՝ ակնարկելով Եւրասիական տնտեսական միութեան շրջանակին մէջ Հայաստանի դիրքին եւ հայ-ռուսական յարաբերութիւններուն առնչուող զարգացումներուն։
Փաշինեան նաեւ մեղադրեց ընդդիմադիր գործիչները՝ փորձելով լարուածութիւն ստեղծել Հայաստանի եւ Ռուսիոյ յարաբերութիւններուն մէջ։ Ան կրկին «եռեակ պատերազմական կուսակցութիւն» անուանեց Հայաստանի դաշինքի առաջնորդ Ռոպերթ Քոչարեանը, «Ուժեղ Հայաստան» դաշինքի ղեկավար Սամուէլ Կարապետեանը եւ «Բարգաւաճ Հայաստան» կուսակցութեան նախագահ Գագիկ Ծառուկեանը։
Ան շեշտեց, որ Հայաստանի իշխանութիւնները մտադիր չեն հակադրուելու Ռուսիոյ հետ, սակայն միաժամանակ պիտի շարունակեն պաշտպանել Հայաստանի շահերը։
«Մեր ռուս գործընկերներուն ըսած ենք, որ ձեզի հետ պիտի չկռուինք, պիտի չվիճինք եւ բանավէճերու մէջ պիտի չմտնենք։ Համբերութեամբ եւ հանգստութեամբ պիտի պաշտպանենք մեր դիրքորոշումները։ Պիտի չգործենք Ռուսիոյ շահերուն դէմ, բայց նաեւ պիտի չգործենք Հայաստանի շահերուն դէմ», յայտարարեց Փաշինեան։
