Իսակ Իւնանէսեանի Հեղինակած «Իրանի Հայերը Եւ Անուանի Իրանահայեր» Գիրքի Շնորհահանդէսը
- (0)
Վերջերս Թեհրանի մէջ հրապարակուեցաւ «Իրանի հայերը եւ անուանի իրանահայերը» պարսկերէնով գիրքը` հեղինակութեամբ Թեհրանի Հայ դատի յանձնախումբի նախագահ դոկտ. Իսակ Իւնանէսեանի: Արդարեւ, նախաձեռնութեամբ Թեհրանի Հայ դատի յանձնախումբի «ՀՈՒՍԿ» հաստատութեան, յիշեալ փաստավաւերագրական գիրքին շնորհահանդէսը տեղի ունեցաւ 3 մարտին, Թեհրանի Հայ հասարակական միութեան (Հայ ակումբ) սրահին մէջ:
Բացման խօսքով հանդէս եկաւ օրուան հաղորդավար Սօսէ Իւնանէսեան, որ անդրադարձաւ Իրանի Եւ Հայաստանի պատմամշակութային ընդհանրութիւններուն եւ Իրանի մէջ իրանահայ համայնքի անմնացորդ դերակատարութեան, ինչպէս նաեւ` «ՀՈՒՍԿ» հաստատութեան ծաւալած աշխատանքներուն, որոնց նպատակն է ներկայացնել իրանահայութեան եւ երկու ժողովուրդներու փոխգործակցութիւնը:
Ապա ցուցադրուեցաւ «ՀՈՒՍԿ»-ի բազմամեայ գործունէութիւնը ներկայացնող տեսերիզ մը:
Օրուան բանախօսն էր արուեստի եւ մշակոյթի վերլուծաբան, համալսարանի դասախօս Արիասբ Դադբեհ, որ ամփոփ կէտերու մէջ ներկայացուց Իրանի եւ հայ ժողովուրդի պատմական անցեալը, փոխգործակցութիւնը` հաստատելով դոկտ. Իսակ Իւնանէսեանի գրչին պատկանող գիրքին ունեցած դերակատարութեան իրանահայ համայնքը ներկայացնելու առումով:
Իրանի մէջ կրօնական փոքրամասնութիւններու հարցով հանրապետութեան նախագահի յատուկ ներկայացուցիչ Մահմուտ Ալաւի իր ելոյթին մէջ գնահատեց Իսակ Իւնանէսեանի կարեւոր քայլը իրանահայ համայնքի ականաւոր դէմքերը Իրանի հասարակութեան ներկայացնելու համար:
Ապա խօսք առաւ հասարակական հարցերով հանրապետութեան նախագահի յատուկ ներկայացուցիչ դոկտ. Ալի Ռապիի, որ կարեւոր նկատեց Իրանի բնակչութեան անբաժան մասնիկը համարուող իրանահայ համայնքի ազնիւ եւ անվերապահ աշխատանքները:
