Գոնգորտիա համալսարանին մէջ՝ հարիւրամեակի զոյգ ձեռնարկ

Հայկական Ցեղասպանութեան Հարիւրամեակի Գանատայի Մարմնի կազմակերպած եզրափակիչ ձեռնարկներու ծիրէն ներս, Շաբաթ 12 Դեկտեմբեր 2015, Գոնգորտիա համալսարանի J.A. De Sève շարժապատկերի սրահին մէջ, տեղի ունեցաւ «The 40 Days of Musa Dagh: A Historical Perspective» նիւթով բանախօսութիւնը՝ Carnegie Corporation of New York–ի նախագահ Վարդան Գրիգորեանի եւ Montreal Institute of Genocide and Human Rights Studies (MIGS) –ի տնօրէն փրոֆ. Ֆրանք Չոքի կողմէ:

Ձեռնարկի բացումը կատարեց Հարիւրամեակի Մարմնի ատենապետ Մհեր Գարագաշեան, նշելով թէ այս անկիւնադարձային տարին կ’ուզեն փակել դիմադրութեան պատգամով: Ան ապա խօսքը փոխանցեց Գոնգորտիա համալսարանի նախագահ փրոֆ. Ալան Շեփըրտի: Համալսարանի նախագահը, ընդգծելէ ետք հայոց ցեղասպանութեան հարիւրամեակի նշանակութիւնը, ներկայացուց օրուայ գլխաւոր բանախօսին՝ տքթ. Գրիգորեանի կենսագրականը ու ապա՝ բեմ հրաւիրեց զայն: Տքթ. Գրիգորեան համապարփակ կերպով ներկայացուց Վերֆելի վէպին տուն տուող պատմական տուեալները ու ընդգծեց անոր պարունակած պատգամի մերօրեայ հնչեղութիւնը: Անոր յաջորդեց Փրոֆ. Ֆրանք Չոքի ելոյթը: Ան յատուկ կանգ առաւ թրքական ուրացման քաղաքականութեան վրայ ու ըսաւ թէ այս երեւոյթը անընդմէջ շարունակուելով՝ սկսած է այլեւս մաս կազմել թրքական ազգային ինքնութեան:

Միջոցառման երկրորդ բաժնով՝ փրոֆ. Չոք ներկայացուց “THE CALL FROM ARMENIA: Canada’s response to the Armenian Genocide” գրքի հեղինակ Արամ Աճէմեանը ու ապա զայն հրաւիրեց՝ ներկայացնելու գիրքը: Աճէմեան սահիկներու ցուցադրութեամբ պարզեց իր հետազօտական աշխատանքի արդիւնքը եւ ամփոփ ակնարկ մը նետեց գրքի ամէն մէկ գլխուն վրայ: Նշենք թէ այս գիրքը՝ կարեւորագոյն նախաձեռնութիւններէն մին է Հայկական Ցեղասպանութեան Հարիւրամեակի Գանատայի Մարմնին: Այս հրատարակութիւնը իր մէջ կը պարփակէ Գանատայի պետական արխիւներէն նոր յայտնաբերուած փաստագրական տուեալներ՝ 1895-էն մինչեւ 1920-ականները երկարող ժամանակահատուածին պատահած հայոց ողբերգութիւններուն ու ցեղասպանութեան մասին: Գիրքը լոյս տեսած է 2015-ի Մայիսին, «Բաստրմաճեան» ֆոնտի մեկենասութեամբ: