Ճատրակ. Հայաստանի Տղոց Հաւաքականը` Աշխարհի Ախոյեանութեան Պրոնզէ Մետալակիր

Երէկ` երեքշաբթի, 28 ապրիլին, Ծաղկաձորի մէջ աւարտեցաւ ճատրակի տղոց աշխարհի խմբային ախոյեանութիւնը, երբ տեղի ունեցան 9-րդ եւ վերջին հանգրուանի ճակատումները:

Հայրենի կազմը իր կատարած վերջին մրցումին 2,5-1,5 արդիւնքով յաղթելով Եգիպտոսի, 11 կէտ ապահովելով գրաւեց երրորդ դիրքը եւ բնականաբար տիրացաւ պրոնզ մետալին:

Ախոյեան հանդիսացաւ Չինաստան (15 կէտով), իսկ փոխախոյեան` Ուքրանիա (12 կէտով):

Նախապէս Հայաստան երեք անգամ տիրացած էր պրոնզ մետալին (1997, 2001 եւ 2005), իսկ 2011-ին հանդիսացած էր աշխարհի ախոյեան:

Իսկ ինչ կը վերաբերի Չինաստանի Շենկտու քաղաքին մէջ աւարտած ճատրակի աղջկանց խմբային ախոյեանութեան, Հայաստան 7 կէտ ապահովելով գրաւեց 7-րդ դիրքը:

Ախոյեան հանդիսացաւ Վրաստան, որ ապահովեց 17 կէտ, մինչ յաջորդաբար երկրորդ եւ երրորդ դիրքերը գրաւեցին Ռուսիա (15 կէտ) եւ Չինաստան (11 կէտ):