Հայ զինուորը առանձին կռուած է 12 Հոգինոց ատրպէյճանական խումբին դէմ
Նռնակի բեկորը խրուած էր անոր բազուկի գրպանին մէջ պահուած Նոր Կտակարանի մէջ
Լրագրող եւ բեմադրիչ Արշակ Զաքարեան իր դիմատետրի էջին վրայ գրած է. «Ատրպէյճանական բանակը հետախուզական ներթափանցման փորձ կատարած է Ղարաբաղի հջւսիս-արեւելեան սահմանին վրայ: Մառախլապատ գիշերով մօտենալով մեր դիրքապահներուն հակառակորդը կրակ բացած է խրամատին մէջ կանգնած մեր երկու զինուորներուն վրայ։ Գնդակը դպնալով առաջին հայ զինուորի սաղաւարտին զինք ուշաթափած է։ Երկրորդ զինուորը, ինքզինք չկորսնցնելով, իր ծառայակիցին քաշած, հանած է թշնամիի կրակի տակէն եւ իր մարմինով զինք պաշտպանած մինակը կռուի բռնուելով 12 հոգինոց ատրպէյճանական հրոսակախումբի հետ։
«Թշնամիի մէկ այլ խումբ, որ դիրքաւորուած եղած է մօտակայ բլուրին ետեւը, ականանետերով սկսած է խոչընդոտել իրենց ընկերներուն օգնութեան շտապող մօտակայ խրամատի հայ զինուորներուն։ Կամօ Յովսեփեան մինակը շարունակած է կռուիլ թշնամիի հետ եւ անոնցմէ մէկը նռնակով զգետնելէ ետք ստիպած է նահանջել իրենց դիրքերը։
«Մարտէն ետք ի յայտ եկած է, որ գնդակը խրուած է ընկերոջ սաղաւարտի մէջ՝ առանց գլխուն վնասելու՝ պարզապէս ինքնաձիգի գնդակի հարուածէն ընկերը ուշաթափ եղած է։ Ինքը՝ Կամոն, ձեռքէն վիրաւորուած է նռնակի բեկորէ, իսկ երկրորդ բեկորը խրուած է անոր բազուկի գրպանին մէջ պահուած Նոր Կտակարանի մէջ։ Կամոն պիտի ստանայ Մարտական Խաչ շքանշան»։