Հայաստանի Մէջ Միացեալ Նահանգներու Դեսպանատունը Կը Դատապարտէ Տէր Զօր Եկեղեցւոյ Աւերումը

ԵՐԵՒԱՆ, «Արմէնփրէս».– Հայաստանի մէջ Միացեալ Նահանգներու դեսպանատունը միացաւ Հայաստանի կառավարութեան ու ժողովուրդին՝ խստիւ դատապարտելով Սուրիոյ Տէր Զօր քաղաքի հայկական եկեղեցւոյ աւերումը: Այս մասին նշուած է Հայաստանի մէջ Միացեալ Նահանգներու դեսպանատան տարածած յայտարարութեան մէջ։
«Այս անմիտ աւերածութիւնը կրկին կը փաստէ «Իսլամական պետութիւն» ահաբեկչական կազմակերպութեան բացարձակ քամահրանքը Միջին Արեւելքի կրօնական եւ մշակութային հարուստ ժառանգութեան հանդէպ:
Ինչպէս արտաքին գործոց նախարար Քերին նշած է, «Իսլամական պետութիւն»ը համակարգուած կերպով արձանագրած է մարդու իրաւունքներու ու միջազգային իրաւունքի խախտումներ եւ կը հանդիսանայ համաշխարհային ահաբեկչական սպառնալիք: Այս սպառնալիքին դիմակայելու համար Միացեալ Նահանգները կոչ կ՛ուղղէ միջազգային հանրութեան՝ ամրապնդելու միասնական ջանքերը, որպէսզի կարելի ըլլայ կազմալուծել ու վերացնել «Իսլամական պետութիւն»ը», նշուած է յայտարարութեան մէջ։