Փաշինեան շրջապատուած տարածքներու (անկլաւներու) հարցը կապեց Հայաստանի գրաւուած տարածքներուն հետ

ԵՐԵՒԱՆ — Նիկոլ Փաշինեան յայտարարեց, որ Հայաստանն ու Ատրպէյճանը պէտք է շրջապատուած տարածքներու (անկլաւներու) հարցը լուծեն իրաւական հիմքերու եւ սահմանազատման համար գործածուող քարտէսներուն հիման վրայ։

Փաշինեան առաջին անգամ այս հարցը կապեց Ատրպէյճանի կողմէ Հայաստանի տարածքներու գրաւման հետ՝ նշելով, որ եթէ կողմերը առաջնորդուին ներկայ վերահսկողութեան սկզբունքով, ապա Հայաստան կրնայ օրակարգէն դուրս ձգել Ջերմուկի եւ այլ գրաւուած տարածքներու վերադարձի հարցը։

Ան շեշտեց, որ Արծուաշէնի եւ ատրպէյճանական շրջապատուած տարածքներու (անկլաւներու) պարագային պէտք է կիրարկուին միեւնոյն լուծումները։ Ըստ Փաշինեանի՝ հնարաւոր տարբերակները պատրաստ ըլլալէ ետք պիտի ներկայացուին հանրութեան։

Ատրպէյճանի արտաքին գործոց նախարար Ճէյհուն Պայրամով եւս յայտարարեց, որ շրջապատուած տարածքներու (անկլաւներու) վերաբերող հարցերը պիտի քննարկուին եւ լուծուին սահմանազատման գործընթացին ծիրին մէջ։

Միաժամանակ, Պայրամով կրկնեց Հայաստանի Սահմանադրութիւնը փոխելու Պաքուի պահանջը՝ պնդելով, որ Ատրպէյճան խաղաղութեան համաձայնագիրը պիտի չստորագրէ, մինչեւ Սահմանադրութենէն չհեռացուի Անկախութեան հռչակագիրին յղումը։

Փաշինեան պատասխանեց, որ Սահմանադրութեան փոփոխութիւնը ներառուած է «Քաղաքացիական պայմանագիր» կուսակցութեան նախընտրական ծրագիրին մէջ, սակայն ընտրութիւններէն ետք իշխող ուժը խորհրդարանին մէջ չունի անհրաժեշտ սահմանադրական մեծամասնութիւնը։

Իշխանութիւնները առայժմ չեն յստակացուցած, թէ առանց այդ մեծամասնութեան ինչպէ՛ս կրնան սահմանադրական հանրաքուէ կազմակերպել։