Վազգէն Մանուկեանը մէկ տարի անց կը կազմակերպի արտահերթ խորհրդարանական ընտրութիւններ․ Հայրենիքի փրկութեան շարժման յայտարարութիւնը

Նիկոլ Փաշինեանը և նրա վարչախումբը, ըստ էութեան, երկիրը տարան կապիտուլիացիայի՝ համայն հայ ժողովրդին կանգնեցնելով լրջագոյն կորուստների առջև,  փոշիացնելով տասնեակ տարիների՝ մեր համազգային ձեռքբերումները, տևական ժամանակով խոցելի դարձնելով ազգային անվտանգութիւնը: Կատարուածն ազգային աղէտ է և դաւաճանութիւն, որի քաղաքական ու իրաւական ամբողջական գնահատականը կը տրուի առաջիկայում:

Ն. Փաշինեանի և նրա վարչախմբի գործունէութեան իւրաքանչիւր ժամը մեր պետականութիւնը հիւծող և ՀՀ քաղաքացիների անվտանգութեանն ուղղուած սպառնալիք է:

Ակնյայտ է, որ բոլոր ոլորտներում ձախողուած վարչախումբն անկարող է դիմագրաւել աշխարհաքաղաքական  մարտահրաւէրները,  յաղթահարել երկրում օրաւուր խորացող  քաղաքական, սոցիալական, տնտեսական և հոգեբարոյական ճգնաժամը:

Նոր որակի իշխանութեան ձևաւորումը հրամայական է:

Ելնելով ստեղծուած իրավիճակից,  հաշուի առնելով հանրութեան լայն շրջանակների պահանջը, 17 կուսակցութիւնների խորհուրդը որոշել է ընդլայնել իր ձևաչափը՝ ձևաւորելով Հայրենիքի փրկութեան շարժում:

Շարժումը համահայկական է և վերկուսակցական: Շարժման խորհուրդը ներառում է կուսակցութիւնների, մտաւորականութեան և հասարակութեան լայն շրջանակների ներկայացուցիչների:

Հայրենիքի փրկութեան շարժման խորհուրդը յայտարարում է.

1. Շարժման նպատակն է սահմանադրական ճանապարհով օր առաջ ազատուել Հայաստանի աղետաբեր վարչակազմից՝ ստեղծելով անցումային, հակաճգնաժամային կառավարութիւն, որը կը կանխի Հայաստանի պետականութեան  կորուստը, կ՚իրականացնի երկրի հետպատերազմեան առողջացումը, կ՚աշխատի ազգային-պետական շահերի վրայ հիմնուած ներքին և արտաքին քաղաքականութեան, քաղաքացիների անվտանգութեան երաշխաւորման բարձրացման ուղղութեամբ և կը կազմակերպի արտահերթ խորհրդարանական ընտրութիւններ:
2. Որպէս անցումային կառավարութեան ղեկավար՝ Հայաստանի Հանրապետութեան վարչապետ, Խորհուրդն առաջադրում է Վազգէն Մանուկեանի թեկնածութիւնը, որն ունի հակաճգնաժամային կառավարման փորձ, արդիւնաւէտ  բանակցութիւններ վարելու կարողութիւն, ներքին համերաշխութիւն և համազգային համախմբուածութիւն ապահովելու կամք ու վճռականութիւն:
3. Վազգէն Մանուկեանը վարչապետ դառնալուն պէս կասեցնելու է իր կուսակցական գործունէութիւնը, պարտաւորւում է յառաջիկայ խորհրդարանական ընտրութիւններին անձամբ չմասնակցել և չհավակնել վարչապետի պաշտօնին: Միաժամանակ, նա ստանձնում է պարտականութիւն՝ մէկ տարի յետոյ կազմակերպել արտահերթ խորհրդարանական ընտրութիւններ՝ ԸՕ-ին համապատասխան հաւասար  պայմաններ  երաշխաւորելով քաղաքական բոլոր ուժերի համար:
4. Վարչապետի միասնական թեկնածուն՝  2020թ. դեկտեմբերի 5-ին, ժամը 15⁰⁰-ին, Ազատութեան հրապարակում հրաւիրուած համազգային մեծ հանրահաւաքին կը ներկայացնի նոր կառավարութեան առաջնահերթ գործողութիւնները և հակաճգնաժամային քայլերը:

Սիրելի՛ հայրենակիցներ, Հայրենիքի փրկութեան շարժմանը իւրաքանչիւրիդ մասնակցութիւնն անհրաժեշտութիւն է:

 Հայրենիքի փրկութեան շարժման խորհուրդ