Մոնաքոյի Առաջնորդ Պեռնարտ Արք. Պարսին նուէր ստացաւ հայկական գորգ-խաչքար
Մոնաքոյի Առաջնորդ նորին գերազանցութիւն Պեռնարտ Արքեպիսկոպոս Պարսին հիւրընկալեց Հայաստանէն ժամանած ՀՀ Ազգային Ժողովի խօսնակի խորհրդական Վրոյր Փենեսեանը, որ Մոնաքոյի եկեղեցւոյ նուիրաբերեց Հայ Առաքելական եկեղեցւոյ հոգեւոր կեդրոնին՝ Սուրբ Էջմիածնայ մէջ օրհնուած հայկական գորգ-խաչքար, որ իր ուրոյն տեղը պիտի գտնէ Մոնաքոյի նորակառոյց եկեղեցւոյ մէջ: Այս թերեւս առաջին անգամն է, որ հայկական խաչքարը կը ներկայացուի Մոնաքոյի եկեղեցւոյ մէջ, որ նաեւ խորհրդանշական վայր կրնայ դառնալ Մոնաքոյի հայ համայնքին համար:
Գորգ-խաչքարը հիւսուած է 2 ամիս եւ 10 օրերու ընթացքին (հումքը՝ բուրդ եւ մետաքս) համաշխարհային ճանաչում ունեցող հայկական «Մեկերեան Կարպետ» ընկերութեան մէջ, եւ կրկնօրինակուած է Գոշավանքի մէջ գտնուող 12-րդ դարու խաչքարի բնօրինակէն:
Վրոյր Փենեսեանը կը հանդիսանայ նաեւ այս տարի Սեպտեմբեր 2 եւ 3-ին Մոնաքոյի մէջ կայանալիք Հայաստանի օրերը՝ «ARMENIAN COLLECTION 2018 MONTE-CARLO» միջոցառման նախաձեռնողը, որուն նպատակն է Մոնաքոյի եւ Հայաստանի միջեւ տնտեսական եւ մշակութային կապերու ստեղծումը:
