Հայաստանի 17 Տարեկանէն Վար Ֆութպոլի Հաւաքականը` Լիթուանիոյ Մէջ
Նախորդ շաբաթավերջին Հայաստանի 17 տարեկանէն վար ֆութպոլի ազգային հաւաքականը մեկնեցաւ Փալանկա (Լիթուանիա)` իր մասնակցութիւնը բերելու համար 17-23 օգոստոսին տեղի ունենալիք «Էյմպըր» բաժակի միջազգային մրցաշարքին, որուն իրենց մասնակցութիւնը կը բերեն Լիթուանիոյ, Պիելոռուսիոյ, Ուքրանիոյ եւ Հայաստանի 17 տարեկանէն վար հաւաքականները:
Նախքան Լիթուանիա իր մեկնումը, Հայաստանի հաւաքականը բարեկամական մրցում մը կատարեց Բանանց-98-ի դէմ` արձանագրելով 1-0 արդիւնքով յաղթանակ մը:
Հայաստանի հաւաքականի գլխաւոր մարզիչ Տիգրան Պետրոսեանց նկատի առաւ հետեւեալ մարզիկները, որոնք մեկնեցան Փալանկա:
Վահագն Ենգոյեան, Ժոռա Սաֆարեան (Ակադեմիա), Աբրահամ Փորթուգալեան, Սամուէլ Խուրշուդեան, Վարդան Բաբախանեան, Պարգեւ Աբրահամեան, Էրիք Ղարիպեան, Արթուր Խաչատրեան, Կարէն Մելքոնեան, Էրիք Խուրշուդեան (Բանանց), Աշոտ Գրիգորեան (Միքա), Արման Ասիլեան, Յովհաննէս Յարութիւնեան, Միհրան Պետրոսեան, Վիգէն Կարապետեան, Նորայր Գրիգորեան, Ալպերթ Խաչումեան եւ Ռաֆիք Մելիքեան (Փիւնիկ):