Շնորհաւորական ուղերձ Աշխատանքի օրուայ առթիւ

Սիրելի հայրենակիցներ,

շնորհաւորում ենք Աշխատանքի օրուայ առթիւ:

Դարեր շարունակ աշխատանքն ու արարումը եղել են հայի ինքնութեան անբաժանելի մասը: Հայ մարդն իր ստեղծագործ աշխատանքով հայրենիք և պետականութիւն է կերտել:

Աշխատանքը եղել է և շարունակում է մնալ մեր համազգային բարօրութեան և մեր երկրի անխաթար զարգացման հիմնարար ուղին:

Միայն յամառ և հետևողական աշխատանքով է կարելի հանրային կեանքի բոլոր ոլորտներում հասնել շօշափելի արդիւնքների:

Խիստ առանցքային է պետականութեան դերը քաղաքացիների համար արժանապատիւ զբաղուածութիւն ապահովելու գործում: Աշխատանքի արժևորումը՝ արժանապատիւ վարձատրութիւնը, սոցիալական կեանքի պայմանների ստեղծումն ու մեր քաղաքացիների լիարժէք զբաղուածութիւնը պէտք է լինեն սոցիալական և տնտեսական քաղաքականութեան հիմնական առանցքը:

ՀՅԴ-ն կարևորում է սոցիալական արդարութիւնը, տնտեսական զարգացումը, հանրային արդիւնքի արդար բաշխումը և համոզուած է, որ սա է արժանապատիւ քաղաքացի, ազատ, արդար և համերաշխ հասարակութիւն կերտելու ուղին:

Սիրելի հայրենակիցներ,

Մաղթում ենք լաւատեսութիւն՝ համոզուած լինելով, որ մեր միասնական ջանքերը կարող են մօտեցնել բոլորիս համար ցանկալի այն ժամանակը, երբ իւրաքանչիւր հայի ընտանիքում մայիսի 1-ը իրապէս կը նշուի որպէս Աշխատաւորի և Աշխատանքի տօն:

ՀՅԴ Հայաստանի Գերագոյն մարմին