«Ուժեղ Հայաստան» պատրաստ է արտահերթ ընտրութիւններու. Նարեկ Կարապետեան կը հակադարձէ Փաշինեանին
- (0)
ԵՐԵՒԱՆ.- Հայաստանի Ազգային ժողովի ընդդիմադիր «Ուժեղ Հայաստան» խմբակցութեան ղեկավար Նարեկ Կարապետեան յայտարարած է, որ իր քաղաքական ուժը պատրաստ է արտահերթ խորհրդարանական ընտրութիւններու՝ հակադարձելով վարչապետ Նիկոլ Փաշինեանի՝ նոր Սահմանադրութեան ընդունման առնչութեամբ արտայայտած դիրքորոշումին։
«Պատրաստ ենք, օրը ըսէ՛ք», գրած է Կարապետեան՝ ընկերային ցանցերու վրայ կատարած հրապարակումով։ Ան միաժամանակ շեշտած է, որ ժողովուրդը պէտք է իր ձայնը բարձրացնէ իշխանութիւններուն շարունակական զիջումներուն դէմ։
Հոկտեմբեր 22-ին Փաշինեան յայտարարած էր, որ չի բացառեր արտահերթ խորհրդարանական ընտրութիւններու կազմակերպումը, եթէ ընդդիմութիւնը մերժէ աջակցիլ նոր Սահմանադրութեան նախագիծը հանրաքուէի ներկայացնելու նախաձեռնութեան։ Վարչապետին համաձայն, կառավարութիւնը շուտով պիտի հրապարակէ նախագիծը եւ փորձէ համոզել ընդդիմադիր խորհրդարանական ուժերը՝ աջակցելու անոր։
Սահմանադրական փոփոխութիւններու հարցը կը շարունակէ մնալ Հայաստանի ներքաղաքական գլխաւոր տարակարծութիւններէն մէկը։ Պաքու բազմիցս պահանջած է Հայաստանի Սահմանադրութեան փոփոխութիւնը՝ զայն ներկայացնելով իբրեւ խաղաղութեան համաձայնագիրի ստորագրման նախապայման։
Յունիս 7-ի խորհրդարանական ընտրութիւններէն ետք իշխող «Քաղաքացիական պայմանագիր» կուսակցութիւնը չէ ապահոված Սահմանադրութեան փոփոխութեան համար անհրաժեշտ երկու երրորդի մեծամասնութիւնը։ Այս պայմաններուն մէջ ընդդիմութեան մերժումը կը դժուարացնէ իշխանութիւններուն ծրագիրին իրականացումը։
Կարապետեանի արձագանգը կը վկայէ, որ արտահերթ ընտրութիւններու հաւանականութիւնը ընդդիմութեան համար ոչ թէ զսպող միջոց է, այլ քաղաքական նոր մրցակցութեան պատրաստակամութեան առիթ։
