Արցախի Նախագահը Յարգանքի Տուրք Մատուցեց Աշոտ Բեկորի Յիշատակին

ԱՀ նախագահ Արայիկ Յարութիւնեան այսօր` Օգոստոս 24-ին, ծաղիկներ խոնարհեց Արցախեան ազատամարտի մասնակից, առաջին վաշտի հրամանատար, «Արցախի հերոս», «Մարտական խաչ» առաջին աստիճանի շքանշանակիր Աշոտ Բեկորի (Ասկոլկա, իսկական անունը` Աշոտ Ղուլեան) յուշարձանի պատուանդանին` ի յիշատակ հերոսի մահուան 28-րդ տարելիցին:

Ըստ «Արցախփրես»-ի` յարգանքի տուրք մատուցելէն ետք Արայիկ Յարութիւնեան զրուցեց հերոսի այրիին` Նելլի Ղուլեանի եւ ընտանիքի անդամներուն հետ:

Բեկոր ծնած է 1959-ի Հոկտեմբեր 6-ին, Պաքու: Մասնակցած է Ղարաբաղի ազատագրական մարտերէն շատերուն Ասկերանի, Հադրութի, Շահումեանի, Կրկժանի, Վերին Շէնի, Բուզլուխի, Մանաշիդի, Մալիպէյլիի, Խօճալուի, Լեսնոյի, Քարինտակի, Շուշիի, Լաչինի, Մարտակերտի, Կուսապատի, Մաղաւուզի, Սրխաւենդի, Պաշ-Գիւնեփայայի, Օրթա-Գիւնեփայայի, Դրմբոնի մէջ:

Անոր հրամանատարութեամբ ազատագրուած են բազմաթիւ բնակավայրեր: 1992-ի Օգոստոս 24-ին Մարտակերտի շրջանի Դրմբոն գիւղի ազատագրման համար մղուած մարտը վերջինը եղաւ Բեկորին համար:

1993-ին Աշոտ Ղուլեան յետմահու արժանացաւ ԼՂՀ «Մարտական խաչ» առաջին աստիճանի շքանշանի, 1999-ին` ԼՂՀ նախագահի հրամանագիրով` «Արցախի հերոս» բարձրագոյն կոչումին, պարգեւատրուած է «Ոսկէ արծիւ» շքանշանով: Յետմահու արժանացած է «Շուշիի ազատագրում» շքանշանին: Անոր անունով կը կոչուի փողոց Շուշիի, ինչպէս նաեւ Կեդրոնական պաշտպանական շրջանի առաջին մոտոհրաձգային գումարտակը, Ստեփանակերտի N 2 դպրոցը: Բեկորի մարտական անունը կը կրէ անոր կրտսեր որդին, որ ծնած է հօր զոհուելէն ետք:

Leave a Comment

You must be logged in to post a comment.