October 28, 2026
Ընդդիմութիւնը բացատրութիւն կը պահանջէ ատրպէյճանական պենզինի ներածման եւ գիներուն վերաբերեալ
- (0)
ԵՐԵՒԱՆ.- Հայաստանի Ազգային ժողովի «Ուժեղ Հայաստան» խմբակցութեան պատգամաւոր Էտկար Ղազարեան հոկտեմբեր 28-ին հարցականի տակ առաւ Ատրպէյճանէն ներածուող պենզինի տնտեսական առաւելութիւններուն մասին կառավարութեան կատարած յայտարարութիւնները։
Ղազարեան յիշեցուց, որ իշխանութիւնները նախապէս ատրպէյճանական վառելանիւթի ներածումը ներկայացուցած էին իբրեւ շուկային մէջ մրցակցութիւնը խթանող եւ գիներու նուազեցման նպաստող քայլ։ Ան կառավարութենէն պահանջեց ներկայացնել ընթացիկ գիները եւ պարզաբանել, թէ սպառողները իրականութեան մէջ ի՛նչ շահ կ՚ապահովեն այդ գործարքներէն։
Հայաստան ատրպէյճանական ծագումով պենզին ներածել սկսած էր 2025-ի դեկտեմբերին՝ Վրաստանի տարածքով իրականացուած փոխադրութիւններու միջոցով։ Կառավարութիւնը այս զարգացումը ներկայացուցած էր իբրեւ Հայաստանի եւ Ատրպէյճանի միջեւ տնտեսական կապերու հաստատման յատկանշական քայլ։
Սակայն հարցը միայն վառելանիւթի վաճառքի գինը չէ։ Ընդդիմադիր շրջանակներուն համար անհրաժեշտ է յստակացնել առեւտրական գործարքներուն պայմանները, ներմուծող ընկերութիւններուն շահերը եւ Հայաստանի տնտեսութեան վրայ երկարաժամկէտ ազդեցութիւնը։
Յատկանշական է նաեւ, որ Ատրպէյճանի հետ տնտեսական յարաբերութիւններու ընդլայնումը տեղի կ՚ունենայ այնպիսի պայմաններու մէջ, երբ Պաքու կը շարունակէ նախապայմաններ առաջադրել խաղաղութեան համաձայնագիրի ստորագրման համար, իսկ հայ ռազմագերիներն ու պատանդները կը մնան անազատութեան մէջ։
Տնտեսական յարաբերութիւններու բազմազանեցումը կրնայ օգտակար ըլլալ, սակայն անոր արդիւնքները պէտք է գնահատուին հրապարակային եւ ստուգելի տուեալներով։
Կառավարութիւնը պարտաւոր է հանրութեան ներկայացնել այդ գործարքներուն տնտեսական հիմնաւորումները եւ ապահովել, որ առեւտրական նախաձեռնութիւնները չվերածուին Ատրպէյճանի նկատմամբ քաղաքական կախուածութեան նոր միջոցի։
