Ստեփանաւանի մէջ «Քաղաքացիական պայմանագիր»ը պիտի պահէ իշխանութիւնը՝ «Գործարար» կուսակցութեան հետ համաձայնութեամբ

ՍՏԵՓԱՆԱՒԱՆ.- հոկտեմբեր 25-ին կայացած Հայաստանի տեղական ինքնակառավարման մարմիններու ընտրութիւններէն ետք, Ստեփանաւանի մէջ յաղթանակ արձանագրած «Գործարար» կուսակցութիւնը եւ իշխող «Քաղաքացիական պայմանագիր»ը համաձայնած են միասնաբար կազմել համայնքային իշխանութիւնը։

Լոռիի մարզպետ Արէն Մկրտչեան հոկտեմբեր 28-ին յայտարարեց, որ «Քաղաքացիական պայմանագիր»ը պիտի պաշտպանէ գործող համայնքապետ Արմէն Գրիգորեանի վերընտրութիւնը։

Ընտրութիւններու նախնական արդիւնքներով՝ «Գործարար» կուսակցութիւնը ստացած էր քուէներուն 41.38 առ հարիւրը՝ ապահովելով ինը աթոռ, մինչ «Քաղաքացիական պայմանագիր»ը ստացած էր 35.20 առ հարիւրը՝ ութ աթոռ։ «Ուժեղ Հայաստան»ը ապահոված էր չորս աթոռ։

Մարզպետը յայտնեց, որ երկու ուժերը համայնքային խորհուրդին մէջ պիտի գործեն իբրեւ «Քաղաքացիական պայմանագիր»ի մէկ միասնական խմբակցութիւն՝ ունենալով 21 աթոռներէն 17-ը։

Ուշագրաւ է, որ «Գործարար»ի ընտրական ցանկը գլխաւորած Արմէն Գրիգորեան նախապէս անդամ էր իշխող կուսակցութեան։ Ըստ մարզպետին՝ ընտրական ընթացակարգային պատճառներով ան ժամանակաւորապէս առկախած էր իր անդամակցութիւնը եւ արդէն դիմած է զայն վերականգնելու համար։

Այս բացայայտումը նոր հարցադրումներ կը յառաջացնէ Ստեփանաւանի ընտրական մրցակցութեան իրական բնոյթին մասին։ «Գործարար»ի յաղթանակը, որ սկզբնապէս ներկայացուած էր իբրեւ իշխող կուսակցութեան պարտութիւն, փաստօրէն պիտի յանգի նոյն քաղաքական ուժին իշխանութեան պահպանման։

Թէեւ նման համագործակցութիւնը ինքնին ընտրական խախտումի ապացոյց չէ, ընտրողներուն համար էական է գիտնալ, թէ թեկնածուներն ու կուսակցութիւնները ինչպիսի՛ քաղաքական համաձայնութիւններով կը ներկայանան ընտրապայքարին։

Ստեփանաւանի զարգացումները անգամ մը եւս կը շեշտեն տեղական ընտրութիւններու թափանցիկութեան եւ քաղաքական իսկական մրցակցութեան անհրաժեշտութիւնը։