Թուրքիոյ Խորհրդարանը Կը Քննարկէ Սուրիոյ Մէջ Թրքական Բանակին Ուժ Օգտագործել Արտօնող Բանաձեւը
\n
\n
Թուրքիոյ կառավարութիւնը երէկ խորհրդարանին ներկայացուց բանաձեւ մը, որ բանակին կ՛արտօնէ Սուրիոյ մէջ ուժ օգտագործել եւ մաս կազմել ՏԱՀԵՇ-ի դէմ միջազգային դաշինքին:
\n
Թուրքիոյ վարչապետ Ահմեթ Տաւութօղլու յայտարարած էր, որ երեսփոխանները կրնան «առաջարկներուն» ծանօթանալ եւ զանոնք քննարկել հինգշաբթի օր նախատեսուած հրապարակային նիստին ընթացքին:
\n
Բանաձեւը թրքական բանակին կ՛արտօնէ Սուրիոյ մէջ զինուորական գործողութիւններ կատարել եւ հիւսիսային Իրաքի մէջ միջամտել:
\n
Թրքական բանակը արդէն 15 հրասայլեր տեղակայած է սուրիական սահմանին մօտ եւ Այն Արապի (Քոպանի) հիւսիս-արեւմուտքը եղող զօրակայանի մը մէջ գտնուող հրետանիի փողերը ուղղած դէպի սուրիական հողամասեր:
\n
Թրքական պատասխանատու աղբիւր մը «Շարք Աուսաթ» օրաթերթին յայտնեց, որ թրքական հրասայլերը որեւէ պահու կրնան մուտք գործել սուրիական հողամասեր` պաշտպանելու համար թուրք քաղաքացիները, եթէ թրքական հողերուն վրայ հրթիռներ շարունակեն իյնալ:
\n
Մինչ այդ, Քոպանիի մէջ ինքնավար վարչութեան արտաքին յարաբերութեանց պատասխանատուի տեղակալ Իտրիս Նահսան օրաթերթին յայտնեց, որ եթէ ՏԱՀԵՇ յաջողի Քոպանի մուտք գործել, ապա քաղաքին մէջ ջարդ տեղի պիտի ունենայ:
\n
«Սքայ Նիուզ» հաղորդեց, որ թրքական իշխանութիւնները ապահովական պատճառներով գաղթականներուն դիմաց փակած են Քոպանիի մօտ գտնուող սահմանը: Աւելի ուշ «Մայատին» հաղորդեց, որ Քոպանիի մօտ Սուրիա-Թուրքիա սահմանին վրայ ականուած ինքնաշարժ մը պայթած է:
\n
«Պի.Պի.Սի.» հաղորդեց, որ թրքական զինուորական ոստիկանութիւնը արցունքաբեր կազ եւ ջրաշիթ մեքենաներ օգտագործած է` արգելք հանդիսանալու համար, որ հարիւրաւոր քիւրտեր իրենց ազգակիցներուն օգնութեան հասնելու համար մուտք գործեն Սուրիա:
\n
Միւս կողմէ, ԻԹԱՐ-ԹԱՍՍ կը հաղորդէ, որ ուաշինկթընեան ոչ կառավարական Ռազմավարական եւ պիւտճէական գնահատումներու կեդրոնի Իրաքի եւ Սուրիոյ մէջ Միացեալ Նահանգներու զինուորական արշաւին շուրջ զեկուցումին համաձայն, ՏԱՀԵՇ-ի դէմ ամերիկեան զինուորական գործողութիւնները տարեկան 4,2-6,8 միլիառ տոլարի կամ 13-22 միլիառ տոլարի ծախս պիտի պահանջեն: Հեղինակները առաջին պարագային նկատի ունեցած են հինգ հազար ամերիկացի զինուորներու օգտագործման դիպաշարը, իսկ երկրորդին պարագային` 25 հազար զինուորներու
\n