Դրամահաւաք՝ Ի Նպաստ Հայկական Վագըֆ Գիւղին
\n
\n
ԵՐԵՒԱՆ, «Արմէնփրէս».- Թուրքիոյ միակ հայկական գիւղին՝ Վագըֆի անունով, Քընալըատայ կղզիին վրայ տեղի ունեցած է ճաշկերոյթ մը, որուն հասոյթը պիտի յատկացուի գիւղի եկեղեցիին եւ անոր յարակից կառոյցներու շինարարութեան ծախսերուն:
\n Ըստ «Ակօս»ին՝ Վագըֆի ներկայացուցիչները զոհ մատուցած են, ապա բացուած է ճաշի սեղան ու հրամցուած է հայկական աւանդական հարիսան:
\n Արարողութեան ներկայ եղած են Պոլսոյ Հայոց պատրիարքական փոխանորդ Արամ արք. Աթէշեան, Իրանի Հայոց թեմի առաջնորդ Սեպուհ արք. Սարգսեան, Շիշլի թաղամասի փոխքաղաքապետը եւ այլք:
\n Արամ արք. Աթէշեան նշած է, որ գիւղին մէջ տարբեր նախագիծեր իրականացնելու համար անհրաժեշտ 400 հազար թրքական լիրայէն կարելի եղած է հաւաքել 170 հազարը: «Վագըֆը միակ հայկական գիւղն է, զոր մենք այսօր ունինք: Վագըֆի բնակիչները իրենց առանձնայատկութիւնները, աւանդոյթներն ու մշակոյթը պահպանելու համար, իսկական պայքար կը մղեն: Այդ պայքարը միայն Վագըֆի բնակիչներունը չէ, անիկա նաեւ մե՛ր պայքարն է», յայտարարած է Աթէշեան՝ յոյս յայտնելով, որ պահանջուած գումարը արագօրէն կը գոյանայ:
\n