ՀՀ իշխանութիւններից պահանջում ենք հրաժարուել իրենց աղէտալի դիրքորոշումից. ԱՀ ԱԺ յայտարարութիւնը

Ապրիլ 14-ին, Արցախի Հանրապետության Ազգային ժողովը միաձայնութեամբ ընդունեց յայտարարութիւն մը, որուն բովանդակութեան մէջ անընդունելի կը նկատուի Արցախի համար որևէ այլ կարգավիճակ, բացի ինքնորոշումէն։ Ստորեւ՝ յայտարարութիւնը.

Արցախի Հանրապետութեան ներկայիս իրաւաքաղաքական կարգավիճակը ձեւաւորուել է համաժողովրդական կամքի արտայայտութեամբ 3 հանրաքուէների, դրանց արդիւնքում ընդունուած Սահմանադրութեան ազդեցութեամբ եւ հայութեան բոլոր հատուածների միջեւ նախընթաց տարիներին հաստատուած համազգային համաձայնութեան ճանապարհով։

Արցախահայութիւնը քաջ գիտակցում է խաղաղութեան գինը։ Արցախի պետականութիւնը եւ պատմական հայրենիքում ազատ ու անկախ ապրելու իրաւունքը բացարձակ արժէքներ են, եւ դրանցից անգամ պատերազմի սպառնալիքը չի կարող մեզ հետ պահել։ Հայաստան-Ադրբեջան չակերտաւոր խաղաղութեան օրակարգով Արցախն Ադրբեջանին բռնակցելու ցանկացած բանակցային գործընթաց ինքնին, ինչպես նաեւ դրանից բխող փաստաթղթի ստորագրումը տապալում է ոչ միայն Արցախի պետականութիւնը, այլեւ արցախահայութեան իր պատմական հայրենիքում ապրելու անքակտելի իրաւունքը։

Պահանջում ենք, որ Հայաստանի իշխանութիւնները հրաժարուեն իրենց ներկայիս աղէտալի դիրքորոշումից եւ առաջնորդուեն բացառապէս այդ արժէքներով։ Ոչ մի իշխանութիւն իրաւունք չունի խաղաղութեան պատրուակով Արցախի համար անընդունելի կարգավիճակի, ինչպէս նաեւ միջազգայնօրէն ճանաչուած ինքնորոշման իրաւունքի բանակցային նշաձողն իջեցնելու։

Արցախահայութեան անունից դիմում ենք՝

Աշխարհասփիւռ հայութեանը՝ այս արդար պայքարում միասնաբար եւ վճռականօրէն կանգնել Հայաստանի եւ Արցախի, մեր եղբայրների ու քոյրերի կողքին։

ՀՀ ԱԺ մեր գործընկերներին՝ չշեղուել ՀՀ գերագոյն խորհրդի 1992 թուականի յուլիսի 8-ի որոշման ուղեգծից։

Ռուսաստանի ղեկավարութեանը՝ մեզ համար խիստ կարեւոր խաղաղապահ առաքելութեան ընթացքում առիթ չտալ որեւէ մէկին՝ շահարկել ծագող խնդիրները, որպես Արցախի ժողովրդի հետագայ անվտանգութիւնը հարցականի տակ դնելու հիմք։

ԵԱԿՀ Մինսկի համանախագահ երկրներին՝ անկախ առկայ այլ տարաձայնութիւններից, ջանքեր գործադրել, պահպանելու ԼՂ-ի հիմնախնդրի կարգաւորման միակ միջազգային մանդատ ունեցող ձեւաչափ։

 

Leave a Comment

You must be logged in to post a comment.