Վանի Մէջ Պատմական Հայկական Եկեղեցին Իբրեւ Ախոռ Կ՛օգտագործուի
Վանի Գեւաշ (պատմ. Ոստան-EH) շրջանի Ալթընսաչ գիւղին մէջ գտնուող հայկական Սբ. Թովմաս կիսաւէր եկեղեցին այժմ կ՛օգտագործուի իբրեւ ախոռ, կը հաղորդէ «Էրմէնիհապեր»-ը:
Վանայ լիճի ափէն ոչ հեռու 400 մեթր բարձրունքի մը վրայ 10 կամ 11-րդ դարու կառուցուած եկեղեցւոյ մէջ ամփոփուած եղած են Թովմաս առաքեալի մասունքները: Եկեղեցին 1671 թուականի վերանորոգումէն ետք վերածուած է վանական համալիրի: Պատերուն գանձ որոնողներու բացած անցքերու ու շինութեան հասցուած վնասներու հետեւանքով լքուած եկեղեցին այժմ կանգնած է փլուզման վտանգի առջեւ:
Սբ. Թովմաս այցելած թրքական «Gazetekarınca.com» լրատուական կայքի հետազօտող-լրագրող Իքրամ Իշլերը, կիսուելով իր տպաւորութիւններու մասին, կը գրէ.
«Ժամանակին այստեղ հաւատք կար: Քրիստոսի առաքեալները կային: Կը հնչէր հոգեւոր երաժշտութիւն ու պատարագներ կը մատուցուէին: Սակայն եկած է այն օրը, երբ եկեղեցին որպէս ախոռ կ՛օգտագործեն»:
Քանի մը տարի առաջ Վանի զբօսաշրջութեան վարչութիւնը եկեղեցին յայտարարած է զբօսաշրջային գօտի` կոչ ընելով այցելութիւններ կազմակերպելու այնտեղ: Հակադարձելով պատկան մարմիններու անհետեւողականութեան` Իշլերը կը գրէ, որ երբ զբօսաշրջիկը եկեղեցի այցելելէ ախոռ պիտի տեսնէ ու պիտի հիասթափուի:
Լրագրողին խօսքով Վանի մշակոյթի վարչութիւնը դէպի եկեղեցի բարձրացող ճանապարհ կառուցած է, սակայն ան իր նպատակին չի ծառայեր, քանի որ կուպրի բացակայութեան պատճառով ցեխ կ՛առաջանայ՝ ճանապարհը անանցանելի դարձնելով մեքենաներու համար: