ՀՅԴ Հայաստանի Գերագոյն Մարմինի Յայտարարութիւն

Խստօրէն դատապարտում ենք Քննչական կոմիտէի կողմից Հայաստանի Հանրապետութեան քրէական օրէնսգրքի 236-րդ յօդուածի 2-րդ մասի յատկանիշներով օգոստոսի 25-ին նախաձեռնուած քրէական վարոյթի շրջանակներում Դաշնակցութեան անդամների եւ համակիրների բնակարաններում խուզարկութիւնների, ձերբակալութիւնների եւ հարցաքննութիւնների վերաբերեալ տարածած հաղորդագրութեան մէջ տեղ գտած առերեւոյթ կեղծ տեղեկութիւնների եւ օրէնքի խախտումների վերաբերեալ, որոնք եւս մէկ անգամ ապացուցում են, որ այս շինծու գործի նպատակն է շեղել հանրութեան ուշադրութիւնը օրուայ քաղաքական իշխանութիւնների հայրենադաւ ծրագրերից, կասեցնել դրանց դէմ պայքարող անձանց եւ ուժերին:

Ոտնահարելով անմեղութեան կանխավարկածը, փորձելով քողարկել իր ապօրինութիւնները, քննչական կոմիտէն այս հաղորդագրութեամբ փորձում է հանրութեան մօտ ստեղծել տպաւորութիւն` թէ իբր իրականացուած խուզարկութիւնների արդիւնքում «պարզուել է», որ հայրենադաւ իշխանութիւնների դէմ պայքարող անձինք հաւաքներին մասնակցել են նիւթական շահադրդութեամբ: Սա ոչ միայն անարգանք է հայրենիքի համար պայքարողների հասցէին, այլեւ ունի նպատակ` վարկաբեկելու այդ պայքարը, «Հայաստան դաշինքը», Դաշնակցութիւնը, ստեղծի «հիմքեր» նոր ձերբակալութիւններ եւ ակնյայտ ոչ իրաւաչափ ձերբակալուած անձանց նկատմամբ կալանաւորումներ իրականացնելու համար:

Իրաւապահ մարմինների կողմից իրականութեանը չհամապատասխանող տեղեկատուութեան տարածումը նպատակ է հետապնդում կեղծ հիմքեր ստեղծել այս ապօրինի քրէական գործը շարունակելու, դատական ատեաններում կալանաւորումը որպէս խափանման միջոց ընտրելու միջնորդութիւնները «հիմնաւորելու» նպատակ:

Ակնյայտ քաղաքական հետապնդման այս ամօթալի վարքագծի փոխարէն քննչական կոմիտէն եւ դատախազութիւնը պարտաւոր էին քրէական հետապնդում նախաձեռնել ապօրինի գաղտնալսման համար, այլ ոչ թէ ապօրինութիւնների միջոցով մաս դառնալ հայրենադաւ ծրագրերի իրականացմանը կամ անխնայ օգտագործման գործիք դառնալ այդ ծրագրերը իրականացնողների ձեռքին:

ՀՅԴ ՀԱՅԱՍՏԱՆԻ ԳԵՐԱԳՈՅՆ ՄԱՐՄԻՆ

13 յունուար 2022, Երեւան

Leave a Comment

You must be logged in to post a comment.