Հայ-լեհական միութեան նախագահ Հրաչեայ Պոյաճեան արժանացաւ Լոնտոնի պատուոյ քաղաքացիի կոչումին

Հայլեհական հասարակական կոմիտէի նախագահ, 32-ամեայ Հրաչեայ Պոյաճեանը արժանացաւ Լոնտոնի պատուաւոր բնակիչի կոչման։

Հրաչեայ Պոյաճեանը Հայլեհական հասարակական կոմիտէի  նախագահն է, ինչպէս նաեւ Տաճարականներու միաբանութեան ասպետ։ Ծնած է 1985 թուականին Եղեգնաձորի մէջ։ 1996 թուականին տեղափոխուած է Լեհաստան, յաճախած է Սիլեզիայի համալսարանի իրաւաբանական բաժինը: Կը զբաղի գործարարութեամբ։

Ապրիլ 12-ին Լոնտոնի մէջ կայացած հանդիսաւոր ձեռնարկին ընթացքին քաղաքապետարանի ներկայացուցիչ Մուարայ Քրայգը իրեն յանձնած է «Լոնտոնի ազատ բնակիչ» տիտղոսի հաւաստագիրը։ Այս կոչումը կը տրուի ոչ միայն Լոնտոն քաղաքի վաստակի արժանի քաղաքացիներուն, այլեւ օտարներուն։  Որոշումը ընդունած է քաղաքային խորհուրդը։ Ան երկրորդ հայն է, որ կ’արժանանայ նման տիտղոսի։

Հրաչեայ Պոյաճեան 2006 թուականին հիմնած է Շլոնսկի հայերու միութիւնը, որուն առաջին ղեկավարը եղած է մինչեւ 2012 թուականը։ 2010 թուականին Սիլեզիա նահանգին մէջ բնակող հայ համախոհներու հետ միասին հիմնադրած է Լեհաստանի Հայ Առաքելական Եկեղեցին՝ որպէս կրօնական կազմակերպութիւն։ Եղած է Եկեղեցական խորհուրդի առաջին ատենապետը, պաշտօնավարած է 2010-էն մինչեւ 2013 թուականը։ Որպէս համահեղինակ (2012 թ.) եւ Հայլեհական հասարակական կոմիտէի նախագահ, Զապժէի մէջ հիմնած է հայկական դպրոց եւ Երուսաղէմի Հայոց Պատրիարք Տ. Եղիշէ Արքեպիսկոպոս Տէրտէրեանի  անուան հայ ազգային գրադարանը։

Leave a Comment

You must be logged in to post a comment.