Միջոցառում՝ «Շուշի. վերադարձ լինելու է» խորագրով
- (0)
Մայիսի 8-ին «Անի Պլազա» հիւրանոցի «Անի» սրահում տեղի ունեցաւ Շուշիի ազատագրման օրուան նուիրուած ՀՅԴ «Նիկոլ Աղբալեան» ուսանողական միութեան միջոցառումը՝ «Շուշի. Վերադարձ լինելու է» խորագրով։
Միջոցառմանը ներկայ էին ՀՅԴ Բիւրոյի եւ Հայաստանի Գերագոյն մարմնի անդամներ, ՀՀ Ազգային ժողովի «Հայաստան» խմբակցութեան պատգամաւորներ, Արցախի Հանրապետութեան պետական պաշտօնեաներ, ինչպէս նաեւ հասարակական-քաղաքական ու հանրային գործիչներ։
Միջոցառումը մեկնարկեց մէկ րոպէ լռութեամբ, ներկաները յարգեցին հայրենիքի պաշտպանութեան սուրբ գործին իրենց կեանքը նուիրաբերած հերոսների յիշատակը: Այնուհետեւ հնչեցին Հայաստանի եւ Արցախի Հանրապետութիւնների օրհներգները։
Ելոյթներով հանդէս եկան ՀՅԴ Հայաստանի Գերագոյն մարմնի ներկայացուցիչ, ՀՀ ԱԺ «Հայաստան» խմբակցութեան պատգամաւոր Իշխան Սաղաթէլեանը, Արցախի Հանրապետութեան Գերագոյն խորհրդի նախկին նախագահ, ԱՀ նախկին արտգործնախարար, ՀՅԴ Արցախի կեդրոնական կոմիտէի անդամ, Հայ Դատի Արցախի գրասենեակի պատասխանատու Գէորգի Պետրոսեանը, ՀՅԴ «Նիկոլ Աղբալեան ուսանողական միութեան» անդամ Վարդան Գալստեանը, ՀՅԴ «Նիկոլ Աղբալեան» ուսանողական միութեան վարչութեան ներկայացուցիչ Տարօն Ղազարեանը :
Իր խօսքում Իշխան Սաղաթէլեանն ասաց. «Հրաժարուել Արցախից, նշանակում է հրաժարուել ծնողից, զաւակից, ինքնութիւնից, արմատներից: Հետեւաբար, որքան էլ պարտադրեն, որքան էլ փորձեն այս ուրացման քաղաքականութիւնը իրականացնել, միեւնոյն է, չեն յաջողելու: Մենք ունենք ազգային երիտասարդութիւն, ովքեր տէր են հայ ժողովրդի հաւաքական իրաւունքներին, ովքեր իրենց գիտելիքներով, իրենց հայրենասիրութեամբ, պատրաստակամութեամբ, այո, պայքարելու են վերադարձի իրաւունքի, պայքարելու են ուժեղ, հզօր Հայաստան ունենալու համար»:
Իշխան Սաղաթէլեանը մէկ անգամ եւս կարեւորելով Շուշիի օրը՝ բոլորին մաղթեց կամք, վճռակամութիւն. «Արցախահայութեան վերադարձը մեզ համար ազգային նպատակ է: Ամէն ինչ անելու ենք մեր վերադարձի համար», նշեց նա:
Վարդան Գալստեանն իր ելոյթումնշեց, որ Շուշիի ազատագրման եւ զարգացման գործում իր մեծ ներդրումն է ունեցել ՀՅԴ աշխարհասփիւռ կառոյցը. «Շուշիի ազատագրմանը մասնակցել են ՀՅԴ անդամներ աշխարհի տարբեր երկրներից: «Հարսանիք լեռներում» գործողութեան իրագործումը հնարաւոր դարձաւ շնորհիւ այն անձանց, ովքեր ոչ միայն մարտի դաշտում, այլեւ պետականաշինութեան գործում ունեցան իրենց հսկայական ներդրումը։ Նրանց ջանքերով է, որ շուրջ 3 տասնամեակ Անառիկ բերդաքաղաքը եղել է Արցախի կրթական եւ մշակութային կեդրոնը»:
Այն ինչ այսօր կատարւում է ժամանակաւոր է, որովհետեւ չարիքը չի կարող յաղթել, ուշ թէ շուտ, դա լինելու է, մեր գործը դրան նախապատրաստուելն է» իր խօսքում ասացԳէորգի Պետրոսեանը:
Միջոցառման ընթացքում ցուցադրուեց փաստավաւերագրական ֆիլմ՝ նուիրուած Անկախութեան շարժմանը եւ Շուշիի ազատագրման գործողութեանը:
«Շուշին՝ մեր ոգու, մեր պատմութեան ու պայքարի խորհրդանիշն է։ Շուշիով ուժեղ էինք, առանց Շուշիի նոյնը չենք, պէտք է ձգտենք դառնալ նոյնը», իր ելոյթում նշեց Տարօն Ղազարեանը:
Միջոցառման աւարտին Իշխան Սաղաթէլեանը հաւաստագրեր յանձնեց «Վահան Յովհաննիսեան» ազգային-քաղաքական դպրոցի շրջանաւարտներին:
Մանրամասները՝ տեսանիւթում.
