Միաբանական Համագումարը Կոչ Ուղղեց՝ Դադրեցնելու Հայաստանեայց Ս. Եկեղեցւոյ, Ամենայն Հայոց Կաթողիկոսին Եւ Հոգեւորական Դասին Նկատմամբ Յարձակումները

16էն 21 Յունիսին, Մայր Աթոռ Սուրբ Էջմիածինի մէջ տեղի ունեցած միաբանական համագումարին մասնակցողները Հայաստանի իշխանութիւններուն կողմէ վերջին շրջանին հրահրուած հակաեկեղեցական արշաւին գծով հանդէս եկան յայտարարութեամբ մը:

Ստորեւ՝ այդ յայտարարութիւնը.

«Մայր Աթոռ Սուրբ Էջմիածնի միաբաններս, որ Արարատեան շաբաթուայ շնորհաբաշխ տօների առիթով ի մի ենք հաւաքուել Սուրբ Էջմիածնումմասնակցելով Միաբանական 9րդ համագումարին, հաւատարիմ մեր սուրբ ուխտին որդիական մեր սէրն ու անվերապահ նուիրումն ենք հաւաստում առ Հայ եկեղեցին, Մայր Աթոռ Սուրբ Էջմիածինը եւ ազգիս Վեհափառ հայրապետին Գարեգին Բ. Ամենայն Հայոց կաթողիկոսին: Անընդունելի ենք համարում եւ դատապարտելի Հայաստանի Հանրապետութեան օրուայ իշխանութիւնների հակաեկեղեցական ու ապազգային ընթացքն իր տարատեսակ դրսեւորումներով: Որպէս Հայ եկեղեցու վարդապետաց դաս` յորդորում ենք մեր սիրելի հաւատաւոր ժողովրդին ի Մայր Հայաստան եւ ի Սփիւռս.

«- Անսասան մնալ իրենց սուրբ եւ ճշմարիտ հաւատքի մէջորպէս նուիրեալ եւ հաւատարիմ զաւակներ Մայր եկեղեցու, չտրուելով չարահնար սադրանքներին ու անցողիկ ապազգային դրսեւորումներին, պահպանելով ողջախոհութիւնը, բարեկրթութիւնը եւ պարկեշտութիւնը: Սիրով ու անշեղ հաւատով պաշտպանել հայրենիքի եւ եկեղեցու բարձրագոյն արժէքները վեր դասելով դրանք անձնական եւ խմբային շահերից, ի նպաստ ազգի ու պետութեան միասնութեան եւ անդորրի:

«- Հաւատարիմ քրիստոնէական արժէքներինամուր կանգնել ազգային ինքնութեան հիմերի վրայ, պահպանել ազգային-հոգեւոր դիմագիծը եւ միասնաբար յաղթահարել արտաքին ու ներքին վտանգներն ու սպառնալիքները համաձայն սուրբ առաքեալի կոչի. «…Միաբա՛ն եղէք, խաղաղութի՛ւն արէք. եւ խաղաղութեան ու սիրոյ Աստուածը թող լինի ձեզ հետ» (Բ Կորնթ. 13:11):

«Կոչ ենք անում հայրենի երկրի իշխանութիւններին.

«- Դադարեցնել Հայաստանեայց Առաքելական Սուրբ եկեղեցու, Ամենայն Հայոց կաթողիկոսի եւ ողջ հոգեւորական դասի նկատմամբ յարձակումները, որոնք ոչ միայն վիրաւորում են հաւատաւոր հայորդիների հոգեւոր եւ կրօնական զգացումները, այլ նաեւ վտանգում են հասարակական համերաշխութիւնը եւ կարող են յանգեցնել ծանր հետեւանքների` վնասելով մեր ժողովրդի, պետութեան եւ պետականութեան անվտանգութեանը:

«- Մեր տարածաշրջանում ծաւալուող ռազմական գործողութիւնների պայմաններում անհրաժեշտ է ամբողջական պատասխանատուութեամբ լծուել պետութեան առջեւ ծառացած անվտանգութեան լրջագոյն մարտահրաւէրների դիմագրաւմանը, այդ թւումներհասարակական համերաշխութեան եւ ազգային միասնութեան պահպանման ուղղութեամբ ի նպաստ մեր ժողովրդի բարեկեցութեան:

«- Հետեւողականօրէն աջակցել բռնի տեղահանուած արցախահայութեան իրաւունքների պաշտպանութեանն ու սոցիալական հիմնախնդիրների լուծմանը, ինչպէս նաեւ ձեռնարկել միջոցներ Արցախի պատմական հոգեւոր եւ մշակութային ժառանգութեան պահպանման համար, որը այսօր կանգնած է ոչնչացման վտանգի առջեւ:

«Հայրենիքի ու եկեղեցու առջեւ ծառացած տարաբնոյթ մարտահրաւէրների պայմաններում Մայր Աթոռի միաբաններսմեզ զօրակից ունենալով Հայ Եկեղեցու Նուիրապետական աթոռների Մեծի Տանն Կիլիկիոյ կաթողիկոսութեան, Երուսաղէմի եւ Կոստանդնուպոլսի Հայոց պատրիարքութիւնների միաբանութիւններին, որպէս արթուն ծառաներ Ամենակալ Աստծոյ եւ հոգեւոր սպասաւորներ բարեպաշտ հայ ժողովրդի, մեր կոչումի բարձր գիտակցութեամբ, միակամ ու միաբան, շարունակելու ենք անձնուրաց կերպով իրականացնել Հայ եկեղեցու հոգեփրկչական ու ազգապահպան պատմական վսեմ առաքելութիւնը` ի պայծառութիւն Հայաստանեայց Առաքելական Սուրբ եկեղեցու եւ ի շինութիւն Հայաստան աշխարհի»: