Մենք պարտաւոր ենք մեր երեխաներին ժառանգել այն հայրենիքը, որտեղից արտագաղթելու իմաստ չլինի․ Ռոբերտ Քոչարեան
Ուզում եմ շնորհակալութիւն յայտնել այն քաղաքացիներին, որոնք վստահել են մեզ և մեզ են տուել իրենց քուէները, մենք ունենք իսկապէս շատ որակեալ ընտրազանգուած. «Հայաստան» դաշինքի 1-ին ընդհանուր ժողովի ժամանակ ասաց ՀՀ 2-րդ նախագահ և դաշինքի ղեկավար Ռոբերտ Քոչարեանը:
«Ես հպարտ եմ, որ մենք արժանացել ենք այդ ընտրազանգուածի վստահութեանը և սա մեծարժէք է և բոլորս դա պէտք է գնահատենք, իսկ այդ ամէնը եղել է մեր թիմի շնորհիւ, չնայած բազմաթիւ ճնշումների, դուք ստանձնել էք պատասխանատուութիւն և այն կատարել էք» ,- նշեց նա:
Ռոբերտ Քոչարեանը նաև ընդգծեց, որ արդիւնքները անսպասելի էին դաշինքի համար և կանխատեսումները եղել են այլ, քանի որ բոլոր հարցումները նկարագրում էին այլ պատկեր:
«Հարց է առաջանում, թե ինչու կայ ակնյայտ տարբերութիւն սպասելիքի և նրա մէջ, այն, ինչ մենք տեսանք և կայ 2 տարբերակ՝մարդիկ իրենց մտածածը չեն ասում, ինչը ևս վատ է պետութեան համար, և նշանակում է, որ մթնոլորտը երկրում այնպիսին չէ, որ քաղաքացին ազատ արտայայտի իր կարծիքը, 2-րդը ընտրութիւնների ժամանակ աշխատել է կեղծիքների մի այնպիսի մեքենայ, որը բաւականին կեղծիքի ծաւալ է ապահովել»,- ասաց Ռոբերտ Քոչարեանը:
Նա նաև նշեց, որ մօտ 200.000 ձայն կասկածի տակ է և նրանք պատրաստւում են դիմել Սահմանադրական դատարան և կը սպասենք հետագայ զարգացումներին:
«Իշխանութիւնը գնացել է ընտրութիւններին՝ չկատարելով ոչ մի խոստում, այդ նոյն իշխանութիւնը պարտուել է պատերազմը, որի ընթացքում ունեցել ենք հազարաւոր զոհեր, կրկնակի զոհեր և առողջ հասարակութիւնը այդպիսի արդիւնքներից յետոյ չպէտք է քուէարկեր իշխանութեան վերարտադրուելու համար»,- նշեց նա:
Նաև ընգդծեց, որ արտահերթ ընտրութիւնների յաջորդ իւրայատկութիւնը կայանում էր նրանում, որ իշխանութիւնը չէր խօսում ապագայ ծրագրերի մասին և անգամ խօսք չկար ժողովրդավարության մասին, իսկ իշխող քաղաքական թիմի հանդիպումները չեն ունեցել այն էներգետիկան, որը եղել է 2018 թուականին, բազմաշատ չէին հանդիպումները:
«Ժողովրդավարութիւնը եղել է 2018 թուականի հիմնական թեմաներից մէկը , իրենց կարգախօսն էլ եղել է ապագայի մասին, բայց ելոյթներում ապագայի մասին ոչ մի խօսք չկար, և սա փաստ է:
Նա նաև անդրադարձաւ 2018 թուականի իրադարձութիւններին և նշեց, որ այդ ժամանակ մարդիկ քուէարկում էին մեծ յոյսով ապագայի նկատմամբ, որ կը լինեն փոփոխութիւններ, որ երկիրը վերելք է ապրելու և շահառուները լինելու են հենց քաղաքացիները:
«Այս ընտրութիւնները ունէին ճիշտ հակառակ պատկերը, այս ընտրութիւնների ժամանակ չկար յոյս , հաւատ դէպի ապագայ և բոլոր հարցումները ցոյց էին տալիս, որ մենք ունենք դեպրեսիւ տրամադրութիւն» ,- նշեց նա:
Ռոբերտ Քոչարեանը նաև նշեց, որ խիստ բևեռացում է եղել տարբեր ընտրազանգուածների մօտ, ինչն էլ հանգեցրել է նման արդիւնքի:
«Մարդկանց մօտ ստեղծուեց մտահոգութիւն, որ հները վերադառնում են և այդ մտահոգութիւնը ուժեղացաւ, երբ 3 նախագահները իրենց դէմքով մասնակցում էին ընտրութիւններին և քարոզարշաւին»,- ասաց Ռոբերտ Քոչարեանը։: