ՀՅԴ 34-րդ Ընդհանուր Ժողով Աւարտեց Իր Աշխատանքները Եւ Ընտրեց Բիւրոյի Նոր Կազմը
8 մարտ 2022-ին Հայաստանի մէջ գումարուած ՀՅԴ 34-րդ Ընդհանուր ժողովը աւարտեց 28 փետրուարին ընթացք առած իր աշխատանքները: Ժողովին օրակարգը կը բխէր հայրենիքի եւ հայութեան առջեւ ծառացած ներազգային, միջազգային եւ տարածաշրջանային մարտահրաւէրներէն, որոնց շուրջ ծաւալեցան խորքային քննարկումներ. ճշդուեցան յաջորդ քառամեակի ՀՅԴ քաղաքական ուղեգիծն ու ռազմավարութիւնը եւ տրուեցան որոշումներ՝ Հայ դատի, արտաքին եւ ներազգային ուղղութիւններով աշխատանքներու, քարոզչական եւ տնտեսական քաղաքականութեան վերաբերեալ:
Ժողովը քննեց եւ գնահատեց ընթացաւարտ ՀՅԴ Բիւրոյի եռամեայ գործունէութիւնը, ներկազմակերպական խնդիրներն ու կատարուելիքները:
Ընդհանուր ժողովը իր օրակարգը սպառելէ ետք ընտրեց կուսակցութեան բարձրագոյն մարմին` Բիւրոն:
ՀՅԴ Բիւրոն իր անդրանիկ նիստին ՀՅԴ Բիւրոյի ներկայացուցիչ ընտրեց Յակոբ Տէր Խաչատուրեանը:
ՀՅԴ նորընտիր Բիւրոյի անդամներն են`
Վիգէն Բաղումեան (Իրան)
Դաւիթ Իշխանեան (Արցախ)
Արսեն Համբարձումեան (Հայաստան)
Կիրօ Մանոյեան (Հայաստան)
Մկրտիչ Մկրտիչեան (Լիբանան)
Խաժակ Մկրտիչեան (Ամերիկայի Միացեալ Նահանգներ)
Արմէն Ռուստամեան (Հայաստան)
Յովսէփ Տէր Գէորգեան (Եւրոպա)
Րաֆֆի Տօնապետեան (Քանատա)
Մուրատ Փափազեան (Եւրոպա):
ՀՅԴ Հանրային կապերու գրասենեակ
8 մարտ 2022