ՀՅԴ Հայաստանի Գերագոյն Մարմնի Յայտարարութիւն

Այսօր, երբ Հայաստանը, Արցախն ու սփիւռքը առաւել քան երբեւէ համախմբուելու եւ մեր պետականութեանն ու հայրենիքին նետուած օրհասական, անվտանգային եւ գոյութենական սպառնալիքները համահայկական ներուժով կանխելու մարտահրաւէրի առջեւ են կանգնած, ապազգային իշխանութիւնները շարունակում են ներազգային պառակտումը խորացնելու եւ ազգային դիմադրողականութիւնը գիտակցուած եւ ծրագրաւորուած թուլացնելու աղէտաբեր քաղաքականութիւնը:

Թիրախում Դաշնակցութեան համազգային կառոյցն է, Հայոց պետականութեան հիմնադիր քաղաքական ուժը, որի պատմութեան իւրաքանչիւր էջը հայ ժողովրդին եւ մեր ազգային իտէալներին ծառայութեան եւ նուիրումի պատմութիւն է:

Ապազգային եւ օտարածին օրակարգերով առաջնորդուող, մեր հաւաքական շահերն ու Հայոց պետականութեան ապագան հարցականի տակ դնող իշխանութիւնները կանգ չեն առնում անգամ քաղաքականօրէն կարճամիտ եւ ապօրինի գործողութիւնների առջեւ:

Քաղաքական բռնաճնշումների, ազգային գաղափարախօսութեան, ազգային արժէքների եւ հաստատութիւնների, բարոյական արժէքների դէմ վարչախմբի պայքարը վաղուց հատել է բոլոր կարմիր գծերը:

Վերջին մի քանի օրերի ընթացքում Հայաստանի Հանրապետութիւն մուտք գործելու իրաւունքից զրկուել եւ անցանկալի անձինք են յայտարարուել ՀՅԴ երեք ներկայացուցիչներ` ՀՅԴ Բիւրոյի անդամ, Ֆրանսայի հայկական կազմակերպութիւնների համակարգող Մուրատ Փափազեանը, ՀՅԴ Նետերլանտների Հայ դատի ատենապետ Մասիս Աբրահամեանը եւ «Գարեգին Նժդեհ» երիտասարդական միութեան անդամ Սիւնէ Աբրահամեանը:

ՀՅԴ Հայաստանի Գերագոյն մարմինը դատապարտում է Հայաստանի իշխանութիւնների կողմից որդեգրուած քաղաքական հաշուեյարդարի, ազգային պառակտումի եւ հայրենազրկումի որդեգրուած քաղաքականութիւնը, այն դիտարկում է օրուայ իշխանութիւնների` օտար օրակարգերն ու շահերը անվերապահ ապասարկելու հերթական դրսեւորում: Միաժամանակ, ամենայն վստահութեամբ յայտարարում ենք, որ այսպիսի դրեւորումները դատապարտուած են ձախողման, իսկ ՀՅԴ-ն չի նահանջելու իր սկզբունքներից եւ քաղաքական հաւատամքից, անելու ենք հնարաւորը, որ երկրում հաստատուի Հայոց պետականութեանն ու համազգային շահերին ծառայող իշխանութիւն:

ՀՅԴ ՀԱՅԱՍՏԱՆԻ ԳԵՐԱԳՈՅՆ ՄԱՐՄԻՆ

Leave a Comment

You must be logged in to post a comment.