Հայ Յեղափոխական Դաշնակցութիւնը վշտակցութիւն եւ զօրակցութիւն կը յայտնէ Ֆրանսայի

Փարիզի Աստուածամօր տաճարին պատուհասած ողբերգական դէպքին առնչութեամբ՝ Հայ Յեղափոխական Դաշնակցութիւնը իր վշտակցութիւնն ու զօրակցութիւնը կը յայտնէ Ֆրանսայի բարեկամ ժողովրդին եւ իշխանութիւններուն:

Ֆրանսան յայտնի է ամէնուր համամարդկային մշակութային յուշարձաններու հանդէպ ցուցաբերած մեծագոյն յարգանքով ու խնամակալութեամբ: Հաւանաբար այդ է նաեւ պատճառներէն մէկը, որ անկախ կրօնական համոզմունքներէն, ամբողջ աշխարհը զօրավիգ է Ֆրանսայի ժողովուրդին՝ դժբախտութիւնը դիմագրաւելու համար:

Լիայոյս ենք, որ աշխարհի տարբեր կողմերէն մէկտեղուած ջանքերու արդիւնքով Աստուածամօր տաճարը կրկին վեր կը յառնէ իր ամբողջ վեհութեամբ, որպէս համաշխարհային խորհրդանիշ Քրիստոնէական հաւատին եւ ֆրանսական մշակութային ժառանգութեան:

ՀՅԴ Հանրային կապերու գրասենեակ