«Հայաստանը Շտապեց Կատարել Ադրբեջանի Պահանջը». Գեղամ Մանուկեան
Այսօր ՀՀ անվտանգութեան խորհրդի քարտուղար Արմէն Գրիգորեանը «Արմէնպրես» պետական գործակալութեանն անակնկալ, օդից իջած մի հարցազրոյց տուեց, որով հաստատեց, որ Հայաստանի զինուած ուժեր Արցախի Հանրապետութեան տարածքում չկան և ՀՀ քաղաքացի-պայմանագրայիններ Արցախի Պաշտպանութեան բանակում չեն ծառայում: Անակնկալ այս հարցազրոյցի պահանջը և իմաստը դժուար է բխեցնել լրագրողական այն հարցից, թէ հնչում են քննադատութիւններ, քանի որ անվտանգային խնդիրներին վերաբերող բազմաթիւ այլ քննադատութիւններ են եղել, իսկ ԱԽ քարտուղարը չի շտապել պատասխանել:
Սա պարզապէս ՀՀ իշխանութիւնների դիրքորոշման հրապարակային հաստատումն է Արմէն Գրիգորեանի միջոցով, որն այսօր, ի լուր աշխարհի, պատասխանեց Ադրբեջանի նախագահին, վստահեցրեց նրան, որ Հայաստանի Հանրապետութիւնը որևէ ռազմական ներկայութիւն չի ունենալու Արցախի Հանրապետութեան տարածքում և Արցախը թողնելու է անպաշտպան:
Այս վստահեցումը պատահական չէ, որովհետև օրերս Իլհամ Ալիևն իր յայտարարութեամբ քննադատել էր նաև ռուսական կողմին, թէ հայկական զինուած ստորաբաժանումներն ամբողջութեամբ դուրս չեն բերուած Արցախի տարածքից:
Այսպէս քայլ առ քայլ Հայաստանի իշխանութիւնները շարունակում են հերթականութեամբ, խելոք կատարել Ալիևի և թուրքական իշխանութիւնների բոլոր պահանջ-նախապայմանները:
Միաժամանակ, այս յայտարարութիւնն այլ վտանգ է պարունակում. սրանով ՀՀ քաղաքացիներին փորձում են վախեցնել, զգուշացնել, որ որևէ մեկի մտքով չանցնի պայմանագրով ծառայութեան անցնել Արցախի Պաշտպանութեան բանակում, քանի որ, ցանկացած անկախատեսելի զարգացման դէպքում, ՀՀ իշխանութիւնը ձեռքերը լուանալու է իր քաղաքացիներից և չի ապահոուելու նրանց պաշտպանութիւնը, եթե, Աստուած մի արասցե, նրանք յայտնվեն ադրբեջանական կողմում: